Լիբանանի մէջ հետզհետէ սաստկացող պատերազմական գործողութիւններու եւ արձանագրուող աւերներու եւ մարդկային կորուստներու մթնոլորտին մէջ պաշտօնական Լիբանան ընդլայնեց իր շփումներու ծիրը: Այս իմաստով նախագահ Ժոզեֆ Աուն Եւրոպական խորհուրդի նախագահ Անթոնիօ Քոսթայի եւ Եւրոպական յանձնաժողովի նախագահ Ուրսուլա Ֆոն Տեր Լեյենի հրաւէրով երէկ «զում»-ի միջոցով հեռավար զրոյցի ընթացքին վերահաստատեց լիբանանեան կառավարութեան կողմէ Հըզպալլայի զինեալ գործունէութիւնը արգիլելու որոշումը եւ պարզեց Լիբանանի ընդհանուր իրավիճակը իսրայէլեան յարձակումներուն հետեւանքով:
«Այն միջոցին, երբ ձեր հետ կը խօսիմ, իմ ժողովուրդէս 600 հազար հոգի տարհանուած թափառական վիճակի մատնուած է, արձանագրուած է 400 զոհ, որոնց 83-ը երեխաներ եւ 42-ը կիներ են, մինչ 1100 վիրաւոր դարմանումի կը սպասէ», յայտնեց նախագահ Աուն` եւրոպական շրջանակներու ուշադրութիւնը հրաւիրելով Լիբանանի ոչ նախանձելի վիճակին վրայ: Նախագահ Աուն այս առիթով դիտել տուաւ, որ երկու մարտի այգաբացին Լիբանանի մէջ պատահածը ուղղակի ծուղակ էր Լիբանանը ներգրաւելու շրջանային պատերազմին մէջ:
Ան օրէնքները անտեսող որակեց Իսրայէլի պատերազմական քայլերը Լիբանանի մէջ, իսկ Հըզպալլան` լիբանանեան իշխանութեան որոշումները անտեսող զինեալ խմբակ: «Աւելի՛ն, երկու մարտի առաւօտեան Լիբանանէն արձակուած վեց հրթիռները, հակառակ իրենց ապարդիւն ուժականութեան, Լիբանանը մղեցին կանխածրագրուած ծուղակի, ուր Լիբանան հարկադրուած պէտք է ըլլար կա՛մ ճակատելու թշնամիին դէմ` վտանգի ենթարկելով իր ժողովուրդը, կա՛մ ալ խուսափելով զինեալ ճակատումէ առիթ ընծայել, որ նշեալ զինեալ խմբակը ի՛նք ճակատի այն ենթադրեալ հիմնաւորումով, թէ պետութիւնը անզօր է պաշտպանելու իր ժողովուրդը», ըսաւ նախագահ Աուն:
Միւս կողմէ, նախագահ Աուն Դանիոյ, Շուէտի եւ Նորվեկիոյ դեսպաններուն հետ իր հաղորդակցութեան ընթացքին անհաւանական նկատեց Իսրայէլի հետապնդած աւերիչ քայլերու իրականացումը Լիբանանի մէջ:
Նոյն ծիրին մէջ, վարչապետ Նաուաֆ Սալամ երէկ վերահաստատեց Հըզպալլան ապազինելու եւ անոր զինեալ գործունէութիւնը արգիլելու որոշումը` ընդգծելով, որ Լիբանանի մէջ ոչ ոք կ՛ընդունի ընդառաջել Իսրայէլի պահանջներուն: Միւս կողմէ, վարչապետ Սալամ երէկ շնորհակալութիւն յայտնեց Սէուտական Արաբիոյ, այս վերջինիս ցուցաբերած զօրակցութեան եւ օժանդակութեան տրամադրութեան համար: Սալամ նաեւ Եւրոպական պետութեանց ուշադրութիւնը հրաւիրեց Լիբանանի այժմու կացութեան վրայ` զօրակցութենէն անդին գործնական օժանդակութեան ակնարկելով: Ան նմանապէս շնորհակալութիւն յայտնեց Ֆրանսայի նախագահ Էմանուել Մաքրոնի նախաձեռնած քայլին, որ կոչ կ՛ուղղէր Իսրայէլի վարչապետին դադրեցնելու Լիբանանի դէմ իսրայէլեան բանակին զինեալ գործողութիւնները:
Իր կարգին, արտաքին գործոց նախարար Եուսեֆ Ռաժժի երէկ հաղորդակցութիւն մը ստացաւ Նորվեկիոյ իր պաշտօնակիցէն` Էսփեն Պարթ Էյտէէն: Այս առիթով Նորվեկիոյ արտաքին գործոց նախարարը վերահաստատեց իր երկրի զօրակցութիւնը Լիբանանի գերիշխանութեան եւ անոր տուած որոշումներուն:
Միւս կողմէ, նախարար Ռաժժի երէկ ընդունեց Լիբանանի մէջ Սուրիոյ դեսպանատան գործավար Այատ Հազզահը, որուն հետ խորհրդակցեցաւ շրջանի եւ յատկապէս Լիբանանի ընդհանուր իրավիճակին մասին` վերջին իրադարձութիւններու լոյսին տակ: Այս առիթով սուրիացի դիւանագէտը լուսաբանութիւններ տուաւ Լիբանանի հետ սուրիական սահմանի երկայնքին սուրիական ուժերու տեղակայումին մասին` նշելով, որ այդ քայլը առնուած է երկիրը պահպանելու օրինազանց եւ փախստական տարրերու դէպի Սուրիա ներթափանցումէն` յիշեցնելով, որ իր երկիրը նմանօրինակ քայլերու ձեռնարկած է նաեւ Իրաքի հետ սահմանի երկայնքին: Փոխադարձաբար, նախարար Ռաժժի անհրաժեշտ նկատեց Սուրիոյ հետ յարաբերութեանց բացուող այս նոր էջի պահպանումը` հիմնուելով երկու պետութեանց ներքին հարցերու միջամտութենէն խուսափելու եւ անոնց գերիշխանութեան ամրապնդումի ճիգերու յարգումին վրայ: Լիբանանի արտաքին գործոց նախարարը բարձր գնահատեց Սուրիոյ պաշտօնական կեցուածքը` անհրաժեշտ նկատելով երկու պետութեանց միջեւ տակաւին առկախ մնացած հարցերու եւ թղթածրարներու քննարկումն ու դասաւորումը, ինչպէս` հասարակաց սահմաններու յստակացում, Սուրիոյ մէջ լիբանանցի անհետացածներու թղթածրարը, Լիբանան ապաստանած սուրիացի տեղահանուածներու տունդարձի կարելիութիւնը եւ լիբանանեան արգելարաններուն մէջ սուրիացի բանտարկեալներու հարցը: