Իրանի զինված ուժերը պահանջել են, որ Բաքուն դուրս բերի իսրայելական զորքերը Ադրբեջանից։ Այս մասին հայտարարել է Իսլամական Հանրապետության զինված ուժերի կենտրոնական շտաբի խոսնակ Խաթամ ալ-Անբիան, փոխանցում է ՏԱՍՍ-ը։
«Մենք հայտարարում ենք հարևան Ադրբեջանին՝ որպես մուսուլմանական երկիր, որ տարածաշրջանում անկայունության տարածումը կանխելու համար անհրաժեշտ է դուրս բերել սիոնիստներին (նկատի ունենալով իսրայելական զինվորականներին) նրա տարածքից և չսպառնալ սեփական ժողովրդի և Իրանի անվտանգությանը», – նրա խոսքերը մեջբերել է իրանական պետական հեռարձակողը։
ԱՄՆ-ն ավելի վաղ լիակատար համերաշխություն է հայտնել Ադրբեջանին և նշել, որ տարածաշրջանում իր գործընկերների տարածքի վրա հարձակումները անընդունելի են և կհանդիպեն ԱՄՆ-ի վճռական աջակցությանը:
ԱՄՆ-ը պետդեպարտամենտը դատապարտել է մարտի 5-ին Իրանի կողմից Ադրբեջանի դեմ անօդաչու թռչող սարքերի հարձակումը։ «Այս հարվածները Ադրբեջանի ինքնիշխանության կոպիտ խախտում են և Իրանի ագրեսիայի ավելորդ սրում»,- ասվում է հաղորդագրության մեջ:
Ադրբեջանի ԱԳՆ-ն շնորհակալություն է հայտնել ԱՄՆ-ին ՝ հայտարարելով, որ «աշխարհի ամենաազդեցիկ երկրի՝ ԱՄՆ-ի աջակցությունը Իրանի կողմից Ադրբեջանի վրա անօդաչու թռչող սարքերի հարձակումների հարցում առանձնահատուկ նշանակություն ունի»։
Մարտի 5-ին ադրբեջանական լրատվամիջոցները հայտնել էին, որ Նախիջևանում ընկել է 2 ԱԹՍ, որոնք, ենթադրաբար, արձակվել էին Իրանից: Ադրբեջանի նախագահ Իլհամ Ալիևը հայտարարել էր, որ երկրի զինված ուժերին հանձնարարվել է պատրաստվել պատասխան գործողությունների։
Թեհրանն, իր հերթին, մեղադրել էր Իսրայելին։ Ադրբեջանի իշխանությունները որոշել էին դադարեցնել բեռնատարների երթևեկությունն Իրանի սահմանին և 12 ժամով փակել էին օդային տարածքի մի մասը։ Մարտի 6-ին Ադրբեջանը հայտարարել էր, որ որոշել է ամբողջությամբ դուրս բերել Թեհրանում գտնվող դեսպանատան և Թավրիզում գտնվող գլխավոր հյուպատոսության անձնակազմը։ Մարտի 7-ին Ադրբեջանի իշխանությունները հայտարարել էին Իրանի Իսլամական հեղափոխության պահապանների կորպուսի (ԻՀՊԿ) կողմից պլանավորված «ահաբեկչական և դիվերսիոն գործողությունների, ինչպես նաև հետախուզական տվյալների հավաքագրման» կանխման մասին։
