1999 թվականից մինչեւ 2017 թվականը ՀՀ պաշտպանության նախարարությունում զինվորական տարբեր պաշտոններ զբաղեցրած Հայկազ Բաղմանյանը, ինչպես նաև նրա ընտանիքի անդամները՝ կինը՝ Նարինե Ադամյանը, որդին՝ Պավել Բաղմանյանը, հարսը՝ Արմինե Ղահրամանյանը և նրանց հետ փոխկապակցված Զարա Ադիյանը, 2026 թվականի մարտի 3-ին հրավիրվել են ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն։ Այս մասին Iravaban.net-ը տեղեկանում է «Ազդարար» էլեկտրոնային ծանուցման միասնական հարթակից։
«Ազդարար» էլեկտրոնային ծանուցման միասնական հարթակում հրապարակված տեղեկատվության համաձայն՝ Բաղմանյանի նկատմամբ իրականացվում է գույքի ուսումնասիրություն, որի արդյունքում կազմվել է ուսումնասիրության նախնական ամփոփագիր։ ՀՀ գլխավոր դատախազության ապօրինի ծագում ունեցող գույքի բռնագանձմանն գործերով վարչությունում իրականացվում է թիվ 22-21-23 ուսումնասիրությունը։Ղեկավարվելով «Ապօրինի ծագում ունեցող գույքի բռնագանձման մասին» ՀՀ օրենքի 16-րդ և 17-րդ հոդվածներով, ծանուցում եմ, որ Հայաստանի
Հանրապետության գլխավոր դատախազության ապօրինի ծագում ունեցող գույքի բռնագանձման գործերով վարչությունում Հայկազ Բաղմանյանին պատկանող գույքի առնչությամբ իրականացվում է ուսումնասիրություն, որի արդյունքում կազմվել է ուսումնասիրության արդյունքների նախնական ամփոփագիր:
Ծանուցման մեջ նշվում է, որ նա իրավունք ունի ներկայանալ դատախազություն, ծանոթանալ հավաքված նյութերին և ներկայացնել իր դիրքորոշումը։
Հիշեցնենք, որ Բաղմանյանի վերաբերյալ գործ է քննվում նաև Հակակոռուպցիոն քրեական դատարանում։ Նա մեղադրվում է ձեռնարկատիրական գործունեությանն ապօրինի մասնակցելու, փողերի լվացման և հայտարարագրման ենթակա տվյալները թաքցնելու մեջ։