Հայաստանի Հանրապետութեան վարչապետ Նիկոլ Փաշինեան Լեհաստանի մէջ դիւանագէտներու եւ վերլուծաբաններու հետ հանդիպումի ընթացքին պատասխանելով այն հարցումին, թէ արդեօք Երեւանը ռուսական բանակի 102-րդ ռազմակայանը Հայաստանի Հանրապետութենէն հեռացնելու հարցով դիմա՞ծ է Մոսկուային, յայտարարեց. «Մենք որեւէ ծրագիր կամ մտահոգութիւն չունինք 102-րդ ռուսական ռազմակայանին առնչուած: Մենք Ռուսիոյ հետ սերտ գործընկերային յարաբերութիւններ ունինք, հաստատուած են տնտեսական եւ քաղաքական կապեր»:
«Մինչեւ 2024 թուականը սահմանային անցակէտերու մեծ մասը կը գտնուէին Ռուսիոյ հսկողութեան տակ, կամ այնտեղ կար ռուս սահմանապահներու ներկայութիւնը, օրինակ` մեր միջազգային օդակայանին մէջ, սակայն ներկայիս բոլոր սահմանային անցակէտերը կը վերահսկուին Հայաստանի սահմանապահներուն կողմէ:
«Բնականաբար, մենք շնորհակալ ենք Ռուսիոյ այնտեղ ներկայութեան համար, իբրեւ նորանկախ պետութիւն 90-ականներու սկզբնաւորութեան մենք կարողութիւն չունէինք այդ տեսակի ծառայութիւն մատուցելու, սակայն մենք ներկայիս կրնանք եւ կը զարգացնենք մեր կարողութիւնները», աւելցուց ան:
Փաշինեան յատուկ ընդգծեց Ռուսիոյ եւ անձամբ Ռուսիոյ նախագահ Վլատիմիր Փութինի վճռորոշ դերը 2020-ի պատերազմին Ազրպէյճանի հետ զինադադարի հաստատման հարցին մէջ: «Յետոյ եղան փաստաթուղթի տարամեկնաբանութիւններ, ուստի անիկա վերածուեցաւ հռչակագիրի, որ ընդունեցինք Միացեալ Նահանգներու մէջ», նշեց ան:
«Մենք ներկայիս նոր յարաբերութիւններ կը ձեւաւորենք Ռուսիոյ հետ», նշեց ան:
«Մենք վճռական ենք եւ պիտի ուզէինք զարգացնել Ռուսիոյ հետ մեր յարաբերութիւնները, սակայն այդ յարաբերութիւնները կը փոխուին տարբեր գործօններու պատճառով», ըսաւ Փաշինեան:
Անդրադառնալով Թուրքիոյ հետ յարաբերութիւններուն` Հայաստանի Հանրապետութեան վարչապետը նշեց. «Յոյս ունինք Հայաստան-Թուրքիա յարաբերութիւններուն մէջ իրական փոփոխութիւններ տեսնել»: