ԱՄՆ Գերագույն դատարանը որոշել է, որ նախագահ Դոնալդ Թրամփի վարչակազմի կողմից այլ երկրների նկատմամբ ներմուծման մաքսատուրքերի սահմանումը ազգային արտակարգ դրության պատրվակով իշխանության չարաշահում էր։
Այսպիսով, Գերագույն դատարանը պաշտպանել է ստորին դատարանի որոշումը։ Վեց դատավոր քվեարկել է որոշման օգտին, երեքը՝ դեմ։
«Կառավարությունը Միջազգային արտակարգ տնտեսական լիազորությունների մասին օրենքը (IEEPA) մեկնաբանում է որպես նախագահին միակողմանիորեն անսահմանափակ մաքսատուրքեր սահմանելու և դրանք իր հայեցողությամբ փոփոխելու լիազորություն։ Նման տեսակետը կհամարվեր նախագահի լիազորությունների վերափոխող ընդլայնում մաքսատուրքային քաղաքականության ոլորտում», – ասվում է որոշման մեջ։
«Նաև նշանակալից է, որ IEEPA-ի գոյության կեսդարյա ընթացքում ոչ մի նախագահ չի կիրառել այս օրենքը՝ որևէ մաքսատուրք սահմանելու համար, առավել ևս՝ նման մասշտաբի և ծավալի մաքսատուրքերի մասին։ «Պատմական նախադեպի բացակայությունը», զուգորդված նախագահի կողմից այժմ պահանջվող լիազորությունների լայն շրջանակի հետ, ցույց է տալիս, որ մաքսատուրքերը գերազանցում են նախագահի «օրինական լիազորությունները», – եզրակացրել է դատարանը։
Միևնույն ժամանակ, Գերագույն դատարանը չի պարզաբանել, թե արդյոք ԱՄՆ վարչակազմը պետք է վերադարձնի մաքսատուրքերով նախկինում վճարված գումարը։ «Այսօր Դատարանը չանդրադարձավ այն հարցին, թե արդյոք կառավարությունը պետք է վերադարձնի ներմուծողներից հավաքված միլիարդավոր դոլարները, կամ եթե այո, ապա ինչպե՞ս», – իր կարծիքում գրել է Գերագույն դատարանի դատավոր Բրեթ Քավանոն։
2025 թվականի ապրիլի 2-ին ԱՄՆ նախագահը հայտարարեց 185 երկրներից և տարածքներից ներմուծվող ապրանքների վրա մաքսատուրքերի մասին։ Ավելի ուշ նախագահը ճշգրտեց որոշ երկրներից ներմուծվող ապրանքների մաքսատուրքերի դրույքաչափերը։ Օգոստոսի 29-ին Կոլումբիայի շրջանի վերաքննիչ դատարանը որոշեց, որ նախագահը լիազորություններ չունի իր հայտարարած մաքսատուրքերի մեծ մասը սահմանելու համար։ Սեպտեմբերի 4-ին ԱՄՆ վարչակազմը միջնորդություն ներկայացրեց Գերագույն դատարան՝ հ