Լիբանանի մէջ Եգիպտոսի դեսպան Ալա Մուսա երէկ առաւօտեան Պաապտայի պալատին մէջ հանրապետութեան նախագահ Ժոզեֆ Աունի հետ իր հանդիպումէն ետք յայտնեց. «Եգիպտոս Հնգեակի պետութիւններուն կողքին յանձնառու է 5 մարտին Փարիզի մէջ նախատեսուած լիբանանեան բանակի եւ ապահովական ուժերու աջակցութեան խորհրդաժողովը յաջողցնելուն»:
«Հանրապետութեան նախագահին հետ խօսեցանք իրանեան-ամերիկեան բանակցութիւններու թղթածրարին մասին: Կը մաղթենք, որ անոնք դէպի յաջողութիւն ուղղուին` նկատի ունենալով անոնց յաջողութեան ազդեցութիւնը շրջանին վրայ: Եգիպտոս յանձնառու է բանակցային հոլովոյթին աջակցութեան», ըսաւ դեսպանը:
«Կը մերժենք Լիբանանի վրայ որեւէ յարձակում եւ կը պահանջենք ամբողջական կերպով գործադրել զինադադարի համաձայնութիւնը, Իսրայէլի բռնագրաւեալ հինգ կէտերէն հեռացումն ու լիբանանցի գերիներուն վերադարձը, մինչ լիբանանան պետութիւնը իր դերը լաւապէս կը կատարէ: Ասիկա եգիպտական հաստատ դիրքորոշում մըն է, որ մեր բոլոր հանդիպումներուն ընթացքին կը կրկնենք», շեշտեց Եգիպտոսի դեսպանը: