Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Նոշպան (դրոտավերին) Հայաստանում ամենատարածված դեղերից է․ այն օգտագործվում է որովայնի, գլխացավերի, դաշտանային և այլ ցավերի դեպքում։ Շատերի համար այն դարձել է «առաջին օգնության» միջոց, սակայն մասնագետները զգուշացնում են՝ նոշպան նույնպես ունի ռիսկեր, հատկապես անկառավարելի օգտագործման դեպքում։
Առաջին հերթին նոշպան ազդում է անոթների վրա՝ թուլացնելով մկանները։ Սա կարող է հանգեցնել արյան ճնշման կտրուկ նվազման, գլխապտույտի, թուլության, սրտխառնոցի։ Ցածր ճնշում ունեցող մարդկանց համար դա կարող է վտանգավոր լինել։
Բացի այդ, դեղը կարող է առաջացնել սրտխփոց, սրտի ռիթմի խանգարումներ, հատկապես՝ մեծ չափաբաժինների կամ հաճախակի օգտագործման դեպքում։ Որոշ մարդկանց մոտ արձանագրվում են նաև ալերգիկ ռեակցիաներ՝ քոր, մաշկի կարմրություն, այտուցներ։
Նոշպայի հաճախակի օգտագործումը կարող է նաև թաքցնել լուրջ հիվանդությունների ախտանիշները։ Օրինակ՝ որովայնի ուժեղ ցավը կարող է լինել ապենդիցիտի, լեղապարկի կամ աղիքների խնդիրների նշան, իսկ ցավը «մարելը» կարող է ուշացնել ճիշտ բուժումը։
Մասնագետները հատուկ ուշադրություն են դարձնում նաև այն փաստին, որ նոշպան խորհուրդ չի տրվում որոշ սրտային, լյարդային և երիկամային խնդիրներ ունեցող անձանց, ինչպես նաև առանց բժշկի խորհրդի՝ երեխաներին և հղիներին։
Արդեն պարզ է․ նոշպան «անվնաս» դեղ չէ։ Ցանկացած ցավի դեպքում դեղը կրկնակի ընդունելու փոխարեն անհրաժեշտ է հասկանալ ցավի պատճառը և, հատկապես երկարատև կամ ուժեղ ցավերի դեպքում, դիմել բժշկի։
Նյութը հրապարակման պատրաստեց Past.am-ը
Հետևեք մեզ՝ այստեղ