Ադրբեջանում ձերբակալվել են Բաքվում օտարերկրյա դիվանագիտական առաքելության դեմ ահաբեկչական հարձակում պլանավորելու մեջ կասկածվող Ադրբեջանի երեք քաղաքացիներ, հայտնում է Ադրբեջանի պետական անվտանգության ծառայությունը:
«Պետական անվտանգության ծառայության կողմից իրականացված օպերատիվ-հետախուզական միջոցառումների ընթացքում հիմնավոր կասկածներ են առաջացել, որ Ադրբեջանի քաղաքացիներ՝ 2000 թվականին ծնված Իլգար Իլհամ օղլու Գուլիևը, մականունը՝ «Աբու Զար ալ-Մուհաջիր», 2005 թվականին ծնված Ամին Էլշադ օղլու Փիրիևը, մականունը՝ «Աբդուրաշիդ», և 2005 թվականին ծնված Էլվին Սանան օղլու Ալիզադեն, մականունը՝ «Աբդուրահման ալ-Ազերի», պատրաստվում էին կրոնական ատելության հողի վրա ահաբեկչական հարձակում իրականացնել Բաքվում գտնվող օտարերկրյա պետության դեսպանատան դեմ», – ասվում է հայտարարության մեջ:
Նշվում է, որ մեղադրյալները «հանցավոր հարաբերությունների մեջ են մտել» «Վիլայաթ Խորասան» ահաբեկչական խմբավորման անդամների հետ, որը միջազգային ահաբեկչական կազմակերպության՝ «Իսլամական պետության» մաս է։