ԱՄՆ նախագահ Դոնալդ Թրամփը նախատեսում է հունվարի 22-ին Դավոսում կայանալիք Համաշխարհային տնտեսական ֆորումի (WEF) շրջանակներում հաստատել Գազայի հարցով Խաղաղության խորհրդի մանդատը և ամբողջական կանոնադրությունը, հայտնել է Bloomberg-ը՝ հղում անելով աղբյուրներին:
Ըստ աղբյուրների՝ Թրամփը պնդում է, որ հրավիրված երկրները հինգշաբթի օրը ստորագրեն փաստաթուղթը՝ նախաձեռնության մեկնարկը պաշտոնապես տալու համար: Կանոնադրության նախագծի համաձայն՝ Թրամփը կդառնա այդ մարմնի առաջին նախագահը և անձամբ կորոշի նոր անդամներ հրավիրելու հարցը:
Կազմակերպությանը մշտական անդամակցություն ստանալու համար ԱՄՆ վարչակազմը պահանջում է, որ պետություններն առաջին տարվա ընթացքում ներդնեն առնվազն 1 միլիարդ դոլար:
Ինչպես նշում է Bloomberg-ը, այս ֆինանսական պահանջը շատ համաշխարհային առաջնորդների անակնկալի է բերել և սուր քննադատության արժանացել:
Խորհուրդը սկզբնապես ստեղծվել էր Գազայի հատվածի վերակառուցումը վերահսկելու համար, սակայն կանոնադրության տեքստից հետևում է, որ նախաձեռնությունն ունի ավելի լայն, ավելի գլոբալ հավակնություններ և կարող է դառնալ ՄԱԿ-ին այլընտրանք: Հրավիրված որոշ կողմեր մտահոգություն են հայտնել, որ Թրամփը՝ որպես նախագահ, միանձնյա վերահսկողություն կստանա նոր կառույցի միջոցների նկատմամբ:
Խորհրդի գործադիր կոմիտեի կազմում արդեն իսկ ընդգրկված են ԱՄՆ պետքարտուղար Մարկո Ռուբիոն, ԱՄՆ նախագահի փեսան՝ Ջարեդ Քուշները, և Մեծ Բրիտանիայի նախկին վարչապետ Թոնի Բլեերը։
Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Ռուսաստանի առաջնորդ Վլադիմիր Պուտինը հրավեր է ստացել միանալու «Խաղաղության խորհրդին»։ Նա հավելել է, որ այս առաջարկության մանրամասները ուսումնասիրվում են։
Հրավերներ են ուղարկվել նաև Եգիպտոսի, Հնդկաստանի, Կանադայի և Թուրքիայի առաջնորդներին։