Իսպանիայի հարավում երկու արագընթաց գնացքների բախման հետևանքով առնվազն 21 մարդ է զոհվել, գրում է BBC-ին։
Վթարի պատճառն անհայտ է, բայց մասնագետներն այն արդեն արտասովոր են անվանում. գնացքները ռելսերից դուրս են եկել վերջերս վերանորոգված երկաթուղու ուղիղ հատվածում։
Գնացքի վթարը տեղի է ունեցել կիրակի օրը՝ տեղական ժամանակով ժամը 19:45-ին, հարավային Իսպանիայում` Անդալուսիայի Ադամուզ քաղաքի մոտ։
Իսպանական երկաթուղային ցանցի օպերատոր Ադիֆի տվյալներով՝ Մալագայից Մադրիդ ուղևորվող Iryo արագընթաց ուղևորատար գնացքը դուրս է եկել գծերից և հատել հարակից գծերը։
Այնուհետև գնացքը բախվել է Մադրիդից Ուելվա ուղևորվող հանդիպակաց գնացքին։
Զոհերի ճշգրիտ թիվը չի հայտարարվել, բայց Իսպանիայի տրանսպորտի նախարար Օսկար Պուենտեի խոսքով՝ ավելի քան 30 մարդ ծանր վնասվածքներով տեղափոխվել է հիվանդանոց։ Անդալուսիայի արտակարգ իրավիճակների ծառայության տվյալներով՝ բախման հետևանքով վիրավորվել է առնվազն 73 մարդ։
Զոհերի ընդհանուր թիվը կարող է ավելի մեծ լինել. փրկարարները զգուշացրել են, որ հնարավոր է, որ մի քանի մարդ մնացել է վնասված վագոններում։
Ըստ Պուենտեի, ինչպես մեջբերել է El Pais-ը, գնացքի ռելսերից դուրս գալը «չափազանց տարօրինակ» է թվում, քանի որ գնացքը ռելսերից դուրս է եկել երկաթուղու ուղիղ հատվածում, որը վերանորոգվել էր անցյալ տարվա մայիսին։ Վերանորոգման վրա ծախսվել էր մոտ 700 միլիոն եվրո։
Պուենտեն հավելել է, որ գնացքը նույնպես նոր էր։