Սպիտակ տունը հաղորդեց, թէ Միացեալ Նահանգներու նախագահ Տանըլտ Թրամփ կայուն, միացեալ եւ ներքին առումով ու իր դրացիներուն հետ խաղաղութեամբ ապրող Սուրիոյ կը զօրակցի:
Այս մասին Սպիտակ տունէն անանուն պաշտօնատար մը յայտնեց Սուրիոյ մէջ ներկայ կացութեան վերաբերեալ հարցումի մը գրաւոր իր պատասխանին մէջ:
«Ասիկա խաղաղ եւ բարգաւաճ Միջին Արեւելքի վերաբերեալ նախագահ Թրամփի տեսլականին հիմնական սիւներէն մէկն է», ըսաւ ան:
Պաշտօնատարը շեշտեց, թէ անհրաժեշտ է, որ Սուրիան «անգամ մը եւս ահաբեկչութեան ճամբարի» չվերածուի:
«Կայուն եւ գերիշխան Սուրիա մը շրջանին կայունութեան համար կենսական կարեւորութիւն ունի», նշեց Սպիտակ տունէն պաշտօնատարը:
Միացեալ Նահանգներու արտաքին գործոց նախարարութիւնը իր կարգին Սուրիոյ մէջ բոլոր կողմերուն ինքնազսպումի կոչ ուղղեց` անհրաժեշտ նկատելով, որ բոլորը կեդրոնանան խաղաղ եւ կայուն Սուրիոյ վերակառուցման վրայ:
Սուրիոյ հարցով ամերիկացի պատուիրակ, Թուրքիոյ մէջ Միացեալ Նահանգներու դեսպան Թամ Պարրաք կոչ ուղղեց վերջ տալու Հալէպի մէջ կառավարական ուժերու եւ քիւրտ զինեալներու միջեւ բախումներուն` յայտնելով, որ Ուաշինկթըն կացութեան նկատմամբ չափազանց մտահոգ է:
Պարրաք յայտնեց, որ իր երկիրն ու անոր դաշնակիցները պատրաստ են նպաստելու կառավարական ուժերուն ու քրտական ուժերուն միջեւ լարուածութեան հանդարտեցման ջանքերուն:
«Սուրիոյ կառավարութեան ու Սուրիոյ ժողովրդավարական ուժերու ղեկավարութեան, քիւրտերու ղեկավարած շրջաններու տեղական իշխանութիւններուն եւ գետնի վրայ բոլոր զինեալ կողմերուն շտապ կոչ կ՛ուղղենք` «դադրեցուցէ՛ք մարտական գործողութիւնները, անմիջապէս վերջ տուէ՛ք լարուածութեան եւ յարգեցէ՛ք մագլցման հանդարտեցումը», աւելցուց Պարրաք: