«Իմնեմնիմի» հաղորդաշարի համահեղինակներ Նարեկ Սամսոնյանի ու Վազգեն Սաղաթելյանի խափանման միջոց կալանքը եւս երեք ամսով երկարաձգելու դատարանի այսօրվա որոշումը նրանց պաշտպաններ Ռուբեն Մելիքյանն ու Արսեն Բաբայանը իրավաբանությունից դուրս են համարում:
-Վերաքննիչ դատարանը նոյեմբերի 14-ից արձանագրել է կոնկրետ Նարեկի մասով, որ պետք է տնային կալանքի տակ լիներ, դրանից խիստ խափանման միջոց չեմ պատկերացնում: Նախանձախնդիր կլինենք, որ դատարանի այսօրվա որոշումը հնգօրյա ժամկետում մեզ տրամադրվի: Դատարանի այսօրվա որոշումը նշանակում է՝ ում նկատմամբ ինչ ուզեն, կանեն,- լրագրողներին ասաց Մելիքյանը:
Նրա խոսքով՝ այս գործով վկան ֆորմալ նշանակություն ունի. «Այդ մարդը նշել է, որ ես այդ երկու հաղորդումները չեմ դիտել, այդ երկու հաղորդումներն են մեղադրանքին վերաբերում: Վկայի մասին տեղեկություն չունենք, անուն, ազգանունը գիտենք: Այս դատավարությունը այլ կերպ կարելի է գնահատել ֆարս ու ձեւականություն»:
Նա ասաց՝ Ալեն Սիմոնյանն այս գործով կարգավիճակ չունի: Հիշեցնենք, որ Ալեն Սիմոնյանի հաղորդման հիման վրա է քրեական վարույթ նախաձեռնվել ու մեղադրանք առաջադրվել Սամսոնյանին ու Սաղաթելյանին:
Արսեն Բաբայանն էլ ասաց, որ Վերաքննիչ դատարանը, երբ արձանագրեց, որ տնային կալանք պետք է ընտրվեր, կալանք տալը սխալ էր, այսօր դատարանը պետք է քններ ոչ թե կալանքը երկարացնելու հարցը, այլ տնային կալանքը երկարացնելու հարցը:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: