Միացյալ Նահանգների նախագահ Դոնալդ Թրամփը հրամանագիր է ստորագրել ԱՄՆ-ի՝ 66 միջազգային կազմակերպություններից դուրս գալու վերաբերյալ։ Այդ մասին տեղեկացնում է Սպիտակ տան պաշտոնական կայքը։
Հրապարակված փաստաթղթերի համաձայն՝ Թրամփը հանձնարարել է «Միացյալ Նահանգները դուրս բերել 66 միջազգային կազմակերպություններից, որոնք այլևս չեն սպասարկում ամերիկյան շահերը»։
Հրամանագրով սահմանվում է, որ ԱՄՆ բոլոր դաշնային գործակալությունները պետք է դադարեցնեն մասնակցությունն ու ֆինանսավորումը ՄԱԿ-ի համակարգում գործող 31, ինչպես նաև ՄԱԿ-ի անդամ չհանդիսացող ևս 35 միջազգային կառույցներում։
Այդ կազմակերպությունների շարքում նշվում են Եվրոպայի խորհրդի Վենետիկի հանձնաժողովը, ՄԱԿ-ի Միջազգային առևտրի կենտրոնը, ՄԱԿ-ի Խաղաղապահ հանձնաժողովը, Ժողովրդավարության հիմնադրամը և մի շարք այլ կառույցներ։