ՀՄԸՄ Պուրճ Համուտի ֆութպոլի խումբը շաբաթ օր մեկնեցաւ հիւսիսային Լիբանանի մայրաքաղաք Թրիփոլի, ուր այցելեց շրջանի հայկական կեդրոնը եւ ջերմ ընդունելութեան արժանանալէ ետք ոգեւորուած մեկնեցաւ դաշտ:
Թրիփոլիի պահեստի դաշտին վրայ ՀՄԸՄ Պուրճ Համուտ Հարաքեթ Շապապի դէմ բաւական լաւ ելոյթ մը ունեցաւ եւ հանգիստ յաղթանակ մը արձանագրեց: Մրցումը եղաւ ՀՄԸՄ-ի տղոց գրեթէ ամբողջական տիրապետութեամբ, բայց տղաքը շատ առիթներ կորսնցուցին, եւ այդ պատճառով ալ արդիւնքը այդքան ալ հանգիստ չէր:
29-րդ վայրկեանին միջնապահ գիծի տինամօ Յակոբ Նաճարեան գնդակը փոխանցեց անցեալ տարուան կոլսքորըր Սերժ Օսքեանին, որ կեդրոնէն յառաջացաւ, քանի մը մրցակից խաբելով փոխանցեց աջ` Ալի Ֆահսին, որ գեղեցիկ օվըր մը բարձրացուց վեթերան Ուասիմ Ապտել Հատիին, որ գլխու հարուածով գրաւեց Հարաքեթ Շապապի բերդը:
Բ. կիսախաղին փոփոխութիւններէն ետք Հիւսէյն Զալզալէ (որ նոր դաշտ ներկայացած էր) փոխանցեց Ապտել Հատիին, որուն հարուածը դպնալէ ետք Հարաքեթ Շապապի բերդի սիւնին` մտաւ անոր մէջ:
2-0 արդիւնքով յառաջացած ՀՄԸՄ-ի տղաքը վերջին վայրկեաններուն առիթ տուին մրցակիցին, որ կրցաւ կոլ մը նշանակել, երբ բերդապահ Մոհամետ Պաթրաշի զսպած գնդակը, դպնալէ ետք սիւնին, վերադարձաւ Ժաաֆար Ֆարելին, որ առանձին նշանակեց հիւսիսի կազմին միակ կոլը:
Այսպէս, ՀՄԸՄ իր 7-րդ կէտը շահեցաւ իր 4-րդ մրցումին եւ կը փորձէ մօտ մնալ պարագլուխի դիրքերուն:
ՀՄԸՄ-ի տղոց յաջորդ մրցակիցը պիտի ըլլայ անցեալ տարուան մրցակից Ղատ Աֆտալը, որ իր կարգին բարձրացած էր Դ. դասակարգէն:
Մրցումը սկզբունքով տեղի պիտի ունենայ շաբաթ օր, Սաֆայի դաշտին վրայ, եւ մեր տղոց կը մնայ մնալ կեդրոնացած` անգամ մը եւս յաղթանակ ձեռք ձգելու համար: