Իսրայէլի կողմէ Սոմալիլանտի ինքնահռչակ հանրապետութեան ճանաչումը անօրինական է: Այս մասին Անգարայի մէջ մամլոյ ասուլիսի ընթացքին յայտարարած է Թուրքիոյ նախագահ Ռեճեփ Թայիփ Էրտողան:
«Սոմալիլանտի ճանաչման մասին որոշումը անընդունելի է եւ անօրինական: Ձեռքերը 71 հազար պաղեստինցիներու արեան մէջ թաթխելով` Նեթանիահուն այժմ ալ կը փորձէ ապակայունացնել ափրիկեան ցամաքամասի արեւելեան շրջանները», Սոմալիի նախագահին հետ միացեալ մամլոյ ասուլիսի ընթացքին ըսած է Էրտողան:
Սոմալիլանտը կը գտնուի Սոմալիի դաշնակցային հանրապետութեան միջազգայնօրէն ճանչցուած տարածքի հիւսիսային հատուածին մէջ:
Անիկա անկախութիւն հռչակած է մայիս 1991 թուականին: Սոմալիլանտի անկախութիւնը ճանչցած միակ երկիրը Իսրայէլն է:
Իսրայէլի վարչապետ Պենիամին Նեթանիահու Սոմալիլանտի անկախութիւնը ճանչցաւ 26 դեկտեմբերին: