ԱՄՆ Պետքարտուղար Մարկո Ռուբիոն կիրակի NBC News-ին տված հարցազրույցում հայտարարել է, որ շաբաթ օրը Վենեսուելայի նախագահ Նիկոլաս Մադուրոյի ձերբակալությանը հանգեցրած ԱՄՆ ռազմական գործողության հիմնական նպատակը ԱՄՆ մուտք գործող թմրանյութերի շրջանառությունը դադարեցնելն էր, և որ Վենեսուելայում ընտրությունների անցկացումն այս փուլում «վաղաժամ» կլինի։
«Մենք կարևորում ենք ընտրությունները, կարևորում ենք ժողովրդավարությունը, կարևորում ենք այդ ամենը, սակայն թիվ մեկ բանը, որը մեզ հետաքրքրում է, Միացյալ Նահանգների անվտանգությունն է, պաշտպանվածությունը, բարեկեցությունն ու զարգացումը։ Եվ հենց դրա վրա ենք մենք կենտրոնանալու՝ առաջին հերթին»,- ասել է Ռուբիոն։
ԱՄՆ գործողությունները Վենեսուելայում
Ռուբիոն նշել է, որ ԱՄՆ-ն և Վենեսուելան «պատերազմի մեջ չեն»։
«Այսինքն՝ մենք պատերազմում ենք թմրանյութերի շրջանառությամբ զբաղվող կազմակերպությունների դեմ, ոչ թե Վենեսուելայի դեմ», – հավելել է պետքարտուղարը։
Նրա մեկնաբանությունները համընկնում էին շաբաթ օրը նախագահ Թրամփի և վարչակազմի այլ պաշտոնյաների հետ անցկացված մամուլի ասուլիսի ընթացքում արված հայտարարություններին, որոնցում շեշտվում էր, որ Վենեսուելայում իրականացված հարվածներն ու Մադուրոյի ձերբակալությունը պարզապես իրավապահ գործողություն են և ոչ թե պատերազմի սկիզբ։
Այնուամենայնիվ, Թրամփը շաբաթ օրը լրագրողներին ասել էր․ «Մենք չենք վախենում ցամաքային զորքերից», սակայն հավելել էր, որ այս պահին ԱՄՆ զինված ուժերի ծառայողներ Վենեսուելայում չկան։
Կոնգրեսում երկու կուսակցությունների ներկայացուցիչները մտահոգություն էին հայտնել, որ այս գործողությունը կարող է սկիզբ դնել նոր և ծախսատար պատերազմի, մինչդեռ դեմոկրատները քննադատել էին Թրամփի վարչակազմին՝ Կոնգրեսին նախապես չտեղեկացնելու և ուժի կիրառման թույլտվություն չստանալու համար։
Կիրակի օրը Ռուբիոն կտրականապես հերքել է, որ այս ռազմական գործողության համար անհրաժեշտ էր Կոնգրեսի նախնական հավանությունը՝ «Meet the Press»-ի վարող Քրիստեն Ուելքերին ասելով․ «Մենք կդիմենք Կոնգրեսին այն գործողությունների համար, որոնք պահանջում են Կոնգրեսի հավանություն… և սա այնպիսի գործողություն չէր, որը պահանջեր Կոնգրեսի հաստատում»։
Ռուբիոն հավելել է, որ շաբաթ օրվա առաքելությունը «նման էր այն գործողություններին, որոնք վերջին 40 տարիների ընթացքում իրականացրել է գրեթե յուրաքանչյուր նախագահ»։
«Տարբերությունն այն է, որ երբ դա Դոնալդ Թրամփն է, դուք գիտեք՝ դեմոկրատները խելագարվում են»,-ասել է պետքարտուղարը։
Ներկայացուցիչների պալատի փոքրամասնության առաջնորդ Հաքիմ Ջեֆրիսը, որը Ռուբիոյից հետո հանդես է եկել «Meet the Press»-ում, հակադարձել է պետքարտուղարի հայտարարություններին՝ հերքելով այն պնդումը, թե շաբաթ օրվա գործողությունը պատերազմական ակտ չէր։
«Վարչակազմը որևէ ապացույց չի ներկայացրել՝ հիմնավորելու համար, որ կատարված գործողությունները պայմանավորված էին ամերիկացի ժողովրդի առողջության, անվտանգության, բարեկեցության կամ ազգային անվտանգության նկատմամբ անմիջական սպառնալիքով», -ասել է Ջեֆրիսը։ «Սա պարզապես հակաթմրանյութային գործողություն չէր։ Սա պատերազմի ակտ էր»։
Վենեսուելայի ղեկավարությունը՝ անորոշության մեջ
Հարցազրույցի ավելի վաղ հատվածում Ռուբիոն անդրադարձել է վերջին ընտրություններին, որոնք Մադուրոն հայտարարել էր, թե հաղթել է՝ չնայած լայնորեն տարածված ապացույցներին, որ նա պարտվել է։
«Ընտրություններ եղել են։ Նրանք պարտվել են, և չեն հաշվարկել ձայները։ Կամ հրաժարվել են հաշվարկել ձայները, և բոլորը դա գիտեն։ Այս ամենը, կարծում եմ, այս պահին վաղաժամ է», – ասել է Ռուբիոն։
Շաբաթ օրը Մար-ա-Լագոյում կայացած մամուլի ասուլիսի ընթացքում Թրամփը հայտարարել էր, որ Մադուրոյի փոխնախագահ Դելսի Ռոդրիգեսը երդվել է որպես նախագահ և կապի մեջ է ԱՄՆ պաշտոնյաների, այդ թվում՝ Ռուբիոյի հետ։ Սակայն ավելի ուշ, նույն օրը, ազգային հեռուստաելույթում Ռոդրիգեսը հայտարարել է․ «Մենք պահանջում ենք նախագահ Նիկոլաս Մադուրոյի և նրա կնոջ՝ Սիլիա Ֆլորեսի անհապաղ ազատ արձակումը»՝ Մադուրոյին անվանելով «Վենեսուելայի միակ նախագահ»։
Շաբաթ օրը ԱՄՆ ուժերի կողմից Մադուրոյի Վենեսուելայից հեռացումից հետո ԱՄՆ մի շարք հանրապետական օրենսդիրներ կոչ են արել, որ երկրի կառավարման ղեկը ստանձնեն Վենեսուելայի քաղաքական ընդդիմության ներկայացուցիչները, այդ թվում՝ անցյալ տարվա Խաղաղության Նոբելյան մրցանակի դափնեկիր Մարիա Կորինա Մաչադոն, այլ ոչ թե Ռոդրիգեսը։
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: