Իշխող «Քաղաքացիական պայմանագիր» կուսակցության անդամ, պատգամավոր Հայկ Սարգսյանը կբողոքարկի կուսակցության վարչության որոշումը՝ 2026 թվականի ընտրություններում կուսակցության ցուցակում ընդգրկվելու իր հայտը մերժելու համար. այս մասին նա ասաց այսօր, լրագրողների հետ զրույցում:
Հիշեցնենք, ՔՊ վարչությունը մերժել էր նրա դիմումը:
Նա մանրամասնեց՝ «Քաղաքացիական պայմանագիր» կուսակցությունը՝ իշխանության գալուց հետո, առաջին անգամն է մասնակցում ընտրություններին: 2021 թվականի արտահերթ ընտրությունների ժամանակ կուսակցության վարչությունն է որոշում կայացրել՝ նախընտրական ցուցակում ընդգրկելու համար: Այժմ, ինչ-որ առումով նոր իրավիճակ է եւ հապճեպ չի որոշվում ցուցակը, այլ առաջադրմամբ եւ կուսակցականների քվեարկությամբ: 370 հոգի ՔՊ ցուցակում ընդգրկվելու հայտ է ներկայացրել, իր կարծիքով, նախընտրական ցուցակում կընդգրկվեն 300-350 հոգի՝ կուսակցության համագումարի ընթացքում՝ պատվիրակների քվեարկությամբ: Այդ քվեարկությունը կորոշի նաեւ թե ովքեր որ հորիզոնականն են ներկայացնելու:
Հայկ Սարգսյանը մանրամասնեց՝ իր գաղափարակից ընկեր եւ վարչապետ Նիկոլ Փաշինյանի հետ դեռ 2000-ականներից է մասնակցել տարբեր նախաձեռնությունների, ապա 2015-ին եղել է ՔՊ-ի հիմնադիր անդամ: Ասաց՝ իրեն մշտապես առաջ է մղել գաղափարը, որ պետք է մշտապես պայքարել՝ ժողովրդի շահերի եւ երկրում հավասարություն հաստատելու համար: Նա հայտարարեց՝ բողոքարկելու է վարչության որոշումը ոչ թե նրա համար, որ ցանկանում է նախընտրական ցուցակում անցողիկ տեղ ունենալ, այլ ցանկանում է ներկայանալ կուսակցականներին իբրեւ ՔՊ հիմնադիր անդամ եւ նրանք կորոշեն իր տեղը նախընտրական ցուցակում: Ինքը վստահ է, որ եթե համագումարը որոշի՝ նախընտրական ցուցակում կունենա անցողիկ տեղ:
Մամուլում տեղեկություններ եղան, որ ՔՊ վարչության որոշումը՝ Հայկ Սարգսյանի դիմումը չընդունելու, կապված է նրա բարեվարքության հետ, մասնավորաբար, քրեական ենթամշակույթի ներկայացուցիչների հետ կապերով պայմանավորված: Հայկ Սարգսյանն ասաց՝ նման հարց չի քննարկվել:
Մանրամասները՝ տեսանյութում
Նելլի ԳՐԻԳՈՐՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: