ԵՐԵՎԱՆ, 17 դեկտեմբերի․/ԱՌԿԱ/․ Երեքշաբթի օրվա արտահերթ նիստում ՀՀ ԱԺ-ն վավերացրել է Ասիական զարգացման բանկի (ԱԶԲ) հետ 250 մլն դոլարի վարկային համաձայնագիրը՝ «Կենսունակության բարելավման և հզորացման համար բնակարանային բարեփոխումներ» (THRIVE) ծրագրի համար։
Արտոնյալ ֆինանսավորման գլոբալ գործիքի հիմնադրամը կտրամադրի լրացուցիչ 16.45 միլիոն դոլար դրամաշնորհային ֆինանսավորում՝ վարկային ծրագիրը համաֆինանսավորելու համար։
ՀՀ աշխատանքի և սոցիալական հարցերի փոխնախարար Դավիթ Խաչատրյանի խոսքով, համաձայնագիրը ստորագրվել է 2025 թվականի հոկտեմբերի 30-ին և նպատակ ունի Հայաստանում զարգացնել կայուն, դիմացկուն և ներառական բնակարանային համակարգ Լեռնային Ղարաբաղից բռնի տեղահանված 109,000 ընտանիքների համար: ԱԶԲ վարկը ունի 27 տարի մարման ժամկետ, այդ թվում՝ 10 տարվա արտոնյալ ժամկետ և 4.93% լողացող տոկոսադրույք։
Խաչատրյանը հիշեցրել է, որ կառավարության կողմից դեռևս 2024 թվականին հաստատվել է Ղարաբաղից բռնի տեղահանված ընտանիքների բնակարանային աջակցության պետական ծրագիրը։
«Ծրագիրը շարունակում է գործել։ Ավելի քան 1600 ընտանիք արդեն բնակարաններ կամ տներ է գնել», – նշել է Խաչատրյանը։
Նրա խոսքով, այսօրվա դրությամբ 3810 ընտանիք դիմել ու ստացել է բնակարանի հավաստագիր, նրանցից 1631-ը ձեռք է բերել տունը։
«Այսօր քննարկվող ծրագիրը ուղղված է այս միջոցառման ֆինանսավորմանը», – պարզաբանել է փոխնախարարը։