Մադրիդի «Ռեալի» ղեկավարությունը՝ ի դեմս նախագահ Ֆլորենտինո Պերեսի, պահպանում է հանգստությունը Վինիսիուս Ժունիորի շուրջ ստեղծված իրավիճակում։ «Արքայական ակումբում» քաջատեղյակ են բրազիլացու խաղային անկման օբյեկտիվ պատճառներին և շարունակում են լիովին աջակցել նրան։ Այս մասին վստահեցնում է AS-ը։
«Մանչեսթեր Սիթիի» դեմ խաղի որոշ դրվագներում «Սանտիագո Բեռնաբեուի» տրիբունաներից լսվող սուլոցները չեն վրիպել ֆուտբոլիստի ուշադրությունից։ Վինիսիուսն ըմբռնումով է մոտենում երկրպագուների դժգոհությանը և կենտրոնացած է բացառապես իր լավագույն որակները վերականգնելու վրա։
Հանդերձարանում բրազիլացին խոստովանել է, որ ֆիզիկապես իրեն լիարժեք լավ չի զգում, ինչն էլ ուղղակիորեն ազդում է նրա պայթյունավտանգ խաղաոճի վրա։ Եթե նախկինում նա հատկապես վտանգավոր էր հանդիպումների վերջնամասում, ապա վերջին ամիսներին էներգիայի պակասը զգալի է դարձել։
«Վալդեբեբասում» իրականացված վերլուծությունները հաստատում են, որ խնդիրը համատարած բնույթ է կրում. ֆիզիկական անկում է ապրում ոչ միայն Վինիսիուսը, այլև ողջ թիմը։ Հենց այս գործոնով է պայմանավորված «Բարսելոնայի» նկատմամբ միավորների առավելության կորուստը։
Չնայած առկա դժվարություններին՝ Վինիսիուսի և ակումբի ղեկավարության հարաբերությունները գերազանց են։ Վստահությունն այնքան մեծ է, որ «Ռեալում» կասկած չունեն պայմանագրի երկարաձգման հարցում։ Գործող համաձայնագրի ավարտին մնացել է մեկուկես տարի, և կողմերն արդեն քննարկում են նոր պայմանագիր կնքելու մանրամասները։
Վերջին խաղերը ցույց տվեցին, որ Վինիսիուսի և գլխավոր մարզիչ Խաբի Ալոնսոյի միջև փոխըմբռնումը լիովին վերականգնվել է։ Էլ Կլասիկոյից հետո առաջացած լարվածությունը, որը ծագել էր բրազիլացու էմոցիոնալ ժեստերի պատճառով (ինչի համար նա ներողություն էր խնդրել), արդեն անցյալում է։ Այս պահին Վինիսիուսն անձեռնմխելի ֆիգուր է Ալոնսոյի համար, և մարզիչը համոզված է, որ հարձակվողի «սև գիծը» շուտով կավարտվի։