Երևանում կայացած Կոնֆերենցիաների լիգայի «Նոա»-«Լեգիա» հանդիպումից հետո ոստիկանությունը ստիպված է եղել միջամտել լեհ երկրպագուների վարքագծի պատճառով։
Ինչպես հայտնում է Sputnik Արմենիան, դեկտեմբերի 12-ին՝ ժամը 00։27-ին, ՀՀ ՆԳՆ ոստիկանություն ահազանգ է ստացվել, որ Վարշավայի թիմի երկրպագուները «Վերնիսաժի» մոտ խուլիգանական վարքագիծ են դրսևորում և կոտրում ամեն ինչ։
Աղբյուրի փոխանցմամբ՝ ոստիկանության գվարդիայի ծառայողները Խանջյան փողոցից բերման են ենթարկել Լեհաստանի Հանրապետության 17 քաղաքացու։ Նրանք կասկածվում են հասարակության նկատմամբ բացահայտ անհարգալից վերաբերմունք դրսևորելու և խուլիգանություն կատարելու մեջ։
ՆԳՆ մամուլի ծառայությունից հայտնել են, որ կազմված փաստաթղթերն արդեն փոխանցվել են քննչական բաժին։