Լուվրի թանգարանում ջրի խողովակի պայթելու պատճառով վնասվել են հարյուրավոր աշխատանքներ․ գրում է BBC-ն։
Դեպքը տեղի է ունեցել թանգարանի աղմկահարույց կողոպուտից ընդամենը մի քանի շաբաթ անց։
Թանգարանի փոխտնօրեն Ֆրենսիս Ստեյնբոկը նշել է, որ արտահոսքից տուժել է 300-400 աշխատանք, հիմնականում՝ գրքեր։
Ստեյնբոկը ֆրանսիական լրատվամիջոցներին ասել է, որ ջրի արտահոսքը տեղի է ունեցել թանգարանի եգիպտական հնությունների բաժնում։
Դեպքը տեղի է ունեցել նոյեմբերի վերջին, սակայն խողովակների հետ եղած խնդիրը հայտնի է եղել տարիներ շարունակ։ Ստեյնբոկի խոսքով՝ խողովակի վերանորոգման աշխատանքները նախատեսված են հաջորդ տարի։
Նշվում է, որ վնասված հատորները կչորացվեն և կվերականգնվեն՝ նախքան թանգարան վերադարձվելը։
Ստեյնբոկը գրքերը նկարագրել է որպես 19-րդ դարի վերջի և 20-րդ դարի սկզբի «եգիպտագիտական պարբերականներ» և «գիտական փաստաթղթեր»։
Նա հավելել է, որ նշված հավաքածուում «անվերականգնելի կորուստներ չունենք»։