Մայր Աթոռում նախատեսված եպիսկոպոսների ժողովի հետաձգման մասին լուրից հետո իշխանության տարբեր ներկայացուցիչներ շտապեցին հայտարարել, թե Եպիսկոպոսաց ժողովը տապալվեց: Վեհափառը չկարողացավ գումարել ո՛չ Եպիսկոպոսաց ժողով, ո՛չ էլ Գերագույն հոգեւոր խորհրդի նիստ: Ըստ տարբեր իշխանական գնահատականների՝ եկեղեցին դուրս է եկել Վեհափառի վերահսկողությունից: Aravot.am-ը Բյուրականի հոգեւոր հովիվ Վրթանես քահանա Բաղալյանից հետաքրքրվեց՝ ինչով է պայմանավորված ժողովի հետաձգումը:
«Տեսա՝ մի բարձրաստիճան պաշտոնյա փորձել էր Վեհափառի անունը իբրեւ թե ավազանի անունով գրել ու Կտրիճ բառը չ-ով էր գրել, եթե Կտրիճ բառի մասին է, պետք է ճ-ով գրվի: Իրենց տգիտությունը սկսվում է անձնանունները գրելուց, լուրջ խնդիր ունեն գրագիտության, առավել եւս հոգեւոր հարցերի հետ կապված: Իրենց գրառումները տգիտության դրսեւորում են: Եպիսկոպոսների ժողովը հետաձգվել է հենց եպիսկոպոսների մի մասի խնդրանքով, որովհետեւ ՀՀ իշխանությունների նկատմամբ վստահություն չունեն, որ այդ ժողովից առաջ կամ հետո նոր եպիսկոպոսների չեն տանի կալանքի: Հայաստանի իշխանությունները վստահություն չեն ներշնչում իրենց ապօրինի կալանավորումներով ու հոգեւորականների նկատմամբ բռնաճնշումներով: Վեհափառը խնդիր չունի՝ ցանկացած պահի կարող է եպիսկոպոսների ժողով հրավիրել, բայց շատ ճիշտ կլինի, որ կալանավայրում գտնվող մեր սրբազանների ներկայությունը ապահովվի, որովհետեւ եթե իրենք այդ ժողովին չեն մասնակցում, ժողովը լիարժեք չի լինում»,- ասաց Տեր Վրթանեսը:
Տեր Վրթանեսի լուսանկարը՝ ֆեյսբուքյան էջից
Անդրադառնալով Ալեն Սիմոնյանի պնդումին, թե ժամանակն է՝ հաջորդ պատարագը Մայր Աթոռում անցկացնելու, Տեր Վրթանեսն ասաց. «Ալեն Սիմոնյանի խոսքը նաեւ լսեցի, որ ասում էր, որ նախկինում պարոն Կճոյանով է դիմել, որ դա իր տգիտության արդյունքն է եղել, ես իր կարծիքը կիսում եմ՝ իր տգիտության արդյունքն է եղել, նաեւ որ Վեհափառ հայրապետին էլ ավազանի անունով են դիմում ինքն ու իր շրջանակի մարդիկ, էլի իրենց տգիտության արդյունքն է:
Ինչ վերաբերում է հաջորդ պատարագը Մայր Աթոռում անցկացնելուն՝ Ալեն Սիմոնյանի այդ հայտարարության տակ ամբողջ գրառումներն էի նայում. ժողովուրդն ասում էր՝ կուզեինք՝ հաջորդ պատարագը Դադիվանքում, Ամարասում, Շուշիի Ղազանչեցոցում անեք: Ժողովուրդն ուզում է՝ հաջորդ պատարագը այնտեղ լինի, ոչ թե Մայր Աթոռում»:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: