Եպիսկոպոսների ստորագրությամբ հայտարարությունը խեղաթյուրումներով շարադրված տեքստ է, հայտնել է Մայր Աթոռ Սուրբ Էջմիածնի տեղեկատվական համակարգի տնօրեն Տեր Եսայի քահանա Արթենյանը՝ անդրադառնալով ավելի վաղ տարածված որոշ եպիսկոպոսների ստորագրությամբ հայտարարությանը։
Նրա խոսքով՝ մի շարք տեղեկություններ և պնդումներ չեն համապատասխանում իրականությանը։
Եսայի քահանան հավելել է, որ այս առնչությամբ անհրաժեշտ քննարկումներից հետո լուսաբանություններ կտրվեն։
Ավելի վաղ վարչապետի աշխատակազմի ղեկավար Արայիկ Հարությունյանը հրապարակել էր եպիսկոպոսների հայտարարության լուսանկարը, որում նշվում է, որ ՔԿ քննությունը հաստատել է Մայր Աթոռի դիվանապետ Արշակ արքեպիսկոպոս Խաչատրյանին վերագրվող տեսանյութի իսկությունը: Փաստաթղթում գրված է, որ արդյունքները ներկայացվել են Գարեգին Բ կաթողիկոսին, որն «անտեսել» է դրանք:
Եպիսկոպոսները կոչ են արել «մաքրել եկեղեցին սրբապիղծ հոգևորականից» և «խստագույնս դատապարտել» կաթողիկոսի դիրքորոշումը: Հայտարարությունը ստորագրել են տասներեք հոգևորականներից ինը, այդ թվում՝ Հովնան Տերտերյանը, Նավասարդ Կճոյանը, Առաքել Քարամյանը, Սիոն Ադամյանը, Վազգեն Միրզախանյանը, Անուշավան Ժամկոչյանը, Վրթանես Աբրահամյանը, Արտակ Տիգրանյանը և Գևորգ Սարոյանը։
Փաստաբան Արսեն Բաբայանը հայտարարել էր, որ ՀՀ քննչական կոմիտեն չի հաստատել Մայր Աթոռի դիվանապետին վերագրվող տեսագրության իսկությունը։ Նրա խոսքով՝ ո՛չ հարցաքննության ընթացքում, ո՛չ էլ դրանից հետո արքեպիսկոպոսին կամ նրա փաստաբանին չեն տրամադրվել փորձաքննություն նշանակելու որոշում կամ փորձաքննության եզրակացություն։
Արքեպիսկոպոս Խաչատրյանը հրաժարվել է լրագրողներին մեկնաբանություն տալ փորձաքննության իսկության մասին հաղորդագրությունների վերաբերյալ։ Նա նշել է, որ ստորագրողները պետք է հաստատեն փաստաթղթի իսկությունը, որից հետո կհրապարակի պարզաբանում։
Խաչատրյանը հավելել է, որ տեղյակ չէ փորձաքննության մասին և ծանոթ չէ դրա եզրակացություններին՝ մեջբերելով իր փաստաբանի մանրամասն մեկնաբանությունը։
