«Այն քաղաքացիները, որոնք նախկինում QR ուղետոմսեր էին ձեռք բերում թղթային տարբերակով, կարող են այլեւս ձեռք բերել տրանսպորտային քարտ, պարբերաբար լիցքավորել եւ օգտվել տրանսպորտային ծառայություններից: Հորդորում եմ մեր քաղաքացիներին, որ տոմսերը ձեռք բերեն նախապես: Քարտերը հնարավոր է լիցքավորել «Թել-Սել» դրամապանակի միջոցով, տերմինալների, Transport.yerevan.am կայքի միջոցով»,-ասուլիսում նշեց Երեւանի քաղաքապետի տեղակալ Սուրեն Գրիգորյանը՝ մանրամասնելով, որ այդպիսով կխուսափեն անհարմարություններից, քանի որ քարտի ակտիվացման համար ժամանակ է պահանջվում:
Նա ասաց, որ հնարավոր է տերմինալի միջոցով եւս տոմսեր գնել, այդ դեպքում նշվում է հեռախոսի համար, եւ նույն հեռախոսի համարով գրանցվելու դեպքում, ընդ որում՝ առանց նույնականացման, գնված տոմսերը հայտնվում են «Թել-Սել» դրամապանակում:
«Ուզում եմ նշել, որ QR ուղետոմսերի դուրս բերման հետ միաժամանակ արդեն նախապես եւ հիմա նաեւ մեկ նոր լուծումով ապահովել է մի քանի այլընտրանք, որից քաղաքացիները կարող են օգտվել: Այս տարբերակներից օգտվելու եւ նախապես համապատասխան քանակով տոմսերը լիցքավորելու դեպքում քաղաքացիները խնդիր չեն ունենա համակարգի հետ շփվելիս:
Իհարկե, հաշվի առնելով, որ մեծ թվով քաղաքացիներ են օգտվում այս համակարգից, առանձին դեպքերում անխուսափելի է խնդիրների առաջացումը՝ ինչպես ցանկացած մեծ համակարգի դեպքում, որին մեր եւ «Թել-Սել» ընկերության զանգերի կենտրոնը հնարավորինս արագ լուծում ենք փորձում տալ »,-ընդգծեց Երեւանի քաղաքապետի տեղակալը:
Նա ասաց, որ փոփոխությունը հատուկ են իրականացրել օգոստոս ամսին, երբ արձակուրդային շրջան է, որպեսզի նրա ձեւակերպմամբ, անցումը աստիճանաբար եւ անցնցում կատարվի:
Մանրամասն՝ տեսանյութում.
Գոհար ՀԱԿՈԲՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: