Մոնթենեկրոյի Պուտվա քաղաքին մէջ տեղի ունեցող բռնցքամարտի Եւրոպայի պատանիներու (մինչեւ 17 տարեկան) ախոյեանութեան մրցումներուն, Հայաստանի հաւաքականը ապահոված է առնուազն երեք պրոնզէ մետալ: Քառորդ աւարտական հասած եօթը հայ մարզիկներէն երեքը կրցան հասնիլ կիսաւարտական` ապահովելով իրենց տեղը պատուոյ հարթակին վրայ:
Յակոբ Շարբաթեան (մինչեւ 50 քկ) քառորդ կիսաւարտականին 4-1 արդիւնքով յաղթեց ուքրանացի Մակար Հոնչարին:
Էդուարդ Քարամեան (մինչեւ 60 քկ) 4-1 արդիւնքով պարտութեան մատնեց իրլանտացի Քրիսթի Ճոյսը:
Հայաստանի հաւաքականի երրորդ մետալը ապահովեց Ռոմիկ Յարութիւնեան (մինչեւ 66 քկ)` 5-0 արդիւնքով վստահ յաղթանակ արձանագրելէ ետք ռումանացի Սեփասթիան Վարանի դէմ մենամարտին:
Աղջկանց մրցումներուն Լիանա Շահինեան (մինչեւ 50 քկ) նաք-աութով պարտութիւն կրեց Լիթուանիոյ ներկայացուցիչ Մարիամա Քարլոնայթէէն:
Կարինէ Դալլաքեան (մինչեւ 52 քկ) 5-0 արդիւնքով պարտութիւն կրեց անգլիացի Տէյլա Լամպերթէն:
Տղոց մրցումներուն Սամուէլ Գրիգորեան (մինչեւ 48 քկ) չկրցաւ պարտութեան մատնել իրլանտացի Ֆին Ռայլին` պարտուելով 5-0 արդիւնքով:
Մենուա Ուլիխանեան (մինչեւ 57 քկ) պարտութիւն կրեց վրացի Մաթէ Վոլոշիկէն` 5-0 արդիւնքով: