9-րդ գումարման խորհրդարանը աւարտեց յանձնախումբերու նախագահներու թեկնածութիւններու քննարկումը: Հաշուիչ յանձնախումբի նախագահ Լիլիթ Մինասեան տեղեկացուց, որ Ազգային ժողովի մշտական 12 յանձնախումբերու նախագահներու ընտրութիւնը պիտի կայանայ այսօր:
Երէկ Ազգային ժողովին մէջ քննարկուած է նաեւ Տարածաշրջանային եւ եւրասիական համարկման հարցերու մշտական յանձնախումբի նախագահի ընտրութեան հարցը: «Քաղաքացիական պայմանագիրը» այս յանձնախումբի նախագահի պաշտօնին ընտրելու համար առաջադրած է Տրդատ Սարգսեանի թեկնածութիւնը:
Քննարկուած է նաեւ Աշխատանքի եւ բարեկեցութեան հարցերու մշտական յանձնախումբի նախագահի ընտրութեան հարցը, այս պաշտօնին մէջ ալ «Քաղաքացիական պայմանագիր»-ը առաջադրած է Նազելի Բաղդասարեանի թեկնածութիւնը:
Քննարկումները անցան առանց ընդդիմադիր խմբակցութիւններուն, քանի որ ընդդիմադիր պատգամաւորները լքած էին նիստերու դահլիճը: Խորհրդարանական ընդդիմութիւնը կը բողոքէր, որ ընդդիմադիր պատգամաւորներու իւրաքանչիւր ելոյթէ ետք իշխանական փոխնախագահները մեկնաբանութիւններ կը կատարէին: