Մոսկուայի մէջ տեղի ունեցաւ «Էյ. Սի. Էյ. 206» մրցաշարքը, որուն գլխաւոր իրադարձութիւնն էր ծանր կշիռի ախոյեան Ալիխան Վախայեւի եւ Ամիր Ալիաքպարի միջեւ տիտղոսի մենամարտը:
Վախայեւ առաջին ռաունտին շատ նեղ կացութեան մատնուեցաւ եւ քիչ մնաց պարտուէր, բայց ան շուտով ինքզինք գտաւ եւ առաջին ռաունտի աւարտէն առաջ նաք-աութով կրցաւ գետին բերել իր մրցակիցը` պահելով ախոյեանի իր տիտղոսը, արձանագրելէ ետք իր 16-րդ յաղթանակը 3 պարտութիւններու կողքին: Ամիրի 5-րդ պարտութիւնն էր իր 21-րդ ելոյթին:
Կիսաթեթեւ կշիռի մրցումներուն հայ մարտիկ Ժորա Այվազեան կրցաւ կէտերով յաղթել Եուսուփ Զուպարիեւին` մենամարտին ամբողջ տեւողութեան տիրապետելէ ետք անոր վրայ:
Մրցաշարքի ամէնէն տպաւորիչ դրուագներէն մէկն էր իր Օսիմխոն Ռախմոնովի նաք-աութը: Թոմաշ Տեաքի դէմ անոր մենամարտին երրորդ ռաունտի վերջին երկվայրկեաններուն ան կրցաւ նաք-աութի ենթարկել մրցակիցը` յաղթելով մենամարտին: