«Ճինիշեան յիշատակի ձեռնարկ»-ին կազմակերպած «Երիտասարդութիւնը ընկերութեան մէջ» աշակերտական բանավէճի 2025-2026 տարեշրջանի առաջին հանրային բանավէճը տեղի ունեցաւ շաբաթ, 20 դեկտեմբեր 2025-ին, Մեսրոպեան վարժարանի սրահին մէջ` երկու նիւթերով:
Նիւթ Ա.
«Կերպընկալի (փլասթիք) արտադրութիւնը պէտք է արգիլուի բնապահպանման համար»:
Թեր` Յովիկ Փոլատեան (Հայ աւետ. երկ. վարժարան, Այնճար), Էլենա Ապուրժէյլի (Հայ աւետ. երկ. վարժարան, Այնճար), Հրակ Փամպուքեան (Հայ աւետ. երկ. վարժարան, Այնճար):
Դէմ` Մարիա Ճիկերեան (Մեսրոպեան բարձ. վարժարան), Ալեքս Պաղճեան (Մեսրոպեան բարձ. վարժարան), Լեթիսիա Փաչանեան (Սրբ. Հռիփսիմեանց վարժարան):
Նիւթ Բ.
«Հայկական վարժարան յաճախելը անհրաժեշտ է սփիւռքի մէջ հայ լեզուն պահելու համար»:
Թեր` Սագօ Պոյաճեան (Հայ աւետ. Շամլեան Թաթիկեան երկ. վարժարան), Անթոնի Սահիունի (Ազգային Միացեալ վարժարան), Բիւզանդ Արսլանեան (Հայ աւետ. կեդրոնական բարձ. վարժարան):
Դէմ` Վահան Քէօրիւքեան (ՀԲԸՄ-ի վարժարաններ, Լիբանան), Սիւզան Պերեճիքեան (Հայ աւետ. երկ. վարժարան, Այնճար), Քլարիթա Մելքոնեան (Հայ աւետ. Շամլեան Թաթիկեան երկ. վարժարան):
Իւրաքանչիւր բանավէճի աւարտին դատական կազմը, որ բաղկացած էր Լուիզա Պապոյեանէն, մեթր Լորա Մերթխանեանէն եւ Ռաքէլ Քէչէճեանէն, արժեւորեց մասնակիցներուն ներկայացումները եւ տուաւ իր գնահատականն ու կատարեց թելադրանքները:
Այնճարի Ազգային Յառաջ վարժարանի հայոց լեզուի դասատու եւ կրթական մշակ Սալբի Թաշճեան գնահատեց ծրագիրը եւ անդրադարձաւ հայ ինքնութիւնը պահելու կարեւորութեան, ինչպէս նաեւ պայքարելու` ի խնդիր հայոց լեզուի պահպանութեան:
«Ճինիշեան յիշատակի ձեռնարկ»-ի տնօրէն Քրիստին Դանիէլեան-Սարգիսեան գնահատեց մասնակիցներուն աշխատանքը եւ յորդորեց` ջանք թափել եւ պատրաստուիլ յառաջիկային առաւել եւս ինքնավստահ եւ պատրաստուած բանավէճեր վարելու:
Ապա մասնակիցները համախմբուեցան «Ճինիշեան յիշատակի ձեռնարկ»-ին մէջ եւ ուրախ մթնոլորտի մէջ դիմաւորեցին Կաղանդ պապուկը, որ իւրաքանչիւրին նուիրեց Հայերէն պատմութեան գիրք մը եւ այբուբենով տպագրուած բաժակներ: