Սեփական հայրենիքում անկախ պետականության պայմաններում հայկական ինքնության վտանգի խնդրի առջեւ ենք կանգնել. Արսեն Համբարձումյան
ՀՅԴ գործունեությունը կասեցնելու որեւէ փորձ չի կարող հաջողել. Համբարձումյան
-Նման ցանկություն կամ նման մտադրություն ունեցող մարդիկ լավ չեն պատկերացնում՝ ինչ ասել է դաշնակցություն: Եթե հասկանային դաշնակցության էությունն ու մեր անցած ճանապարհը, կարծում եմ՝ իրենց նման արտահայտություններ թույլ չէին տա,- այսօր ՀՅԴ 135 ամյակի առիթով լրագրողներին ասաց ՀՅԴ ԳՄ անդամ Արսեն Համբարձումյանը՝ անդրադառնալով իրենց կուսակցությունը փակելու խոսակցություններին:
Համբարձումյանի խոսքով՝ ամենատարբեր ուժերի, ամենատարբեր պետությունների կողմից ՀՅԴ-ն կասեցնելու, թուլացնելու, լուսանցքից դուրս մղելու փորձեր են եղել, բայց որեւէ փորձ չի հաջողվել. «ՀՅԴ-ն շարունակում է իր երթը հակառակ այդ բոլոր մոտեցումների եւ ձեզ վստահեցնում եմ, որ որեւէ փորձ այդ ուղղությամբ չի կարող հաջողել»:
Նա նաեւ ասաց, որ այսօր իրենց առջեւ դրված գլխավոր խնդիրը ազգի ինքնության դեմ ուղղված ներքին ու արտաքին մարտահրավերներն են: Նրա խոսքով՝ այդ ուղղությամբ ազգային բոլոր ուժերը հսկայական անելիք ունեն:
«Դժվար կլիներ երեւակայել, որ սեփական հայրենիքում անկախ պետականության պայմաններում հայկական ինքնության վտանգի խնդրի առջեւ կկանգնենք»,- ասաց Համբարձումյանը:
Արփինե ՍԻՄՈՆՅԱՆ
Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը: