Հենրիկ Մալյանի ծննդյան 100-ամյակին նվիրված միջոցառումների շրջանակում Հայաստանի կինոյի հիմնադրամը Հրանտ Մաթեւոսյանի մշակութային կենտրոնում կազմակերպել է «Մենք ենք, մեր եռանկյունին» խորագրով իմպլեմենտացիոն ցուցադրություն։
Այն նվիրված էր 3 նշանավոր ստեղծագործողների հոբելյանական տարեդարձերին՝ Հենրիկ Մալյանի ու Աղասի Այվազյանի 100-ամյակներին ու Հրանտ Մաթեւոսյանի 90-ամյակին։ Ներկայացվել են «Մենք ենք, մեր սարերը» ու «Եռանկյունին» ֆիլմերի ընտրանի կադրեր, դեկորներ, ստեղծագործական գործընթացին առնչվող ռեկվիզիտներ, անձնական իրեր, արխիվային լուսանկարներ ու փաստաթղթեր, հայտնում է Հայաստանի կինոյի հիմնադրամը:
Նախաձեռնության նպատակն է նորովի ներկայացնել եւ ընդգծել Հենրիկ Մալյանի, Աղասի Այվազյանի եւ Հրանտ Մաթևոսյանի ստեղծագործական ժառանգության բացառիկ արժեքը։
Ցուցադրությունն իրականացվել է ինտերակտիվ մոտեցմամբ, որը հնարավորություն է տալիս այցելուներին ոչ միայն դիտել ներկայացված նյութերը, այլեւ դառնալ դրանց անմիջական մասնակիցը։ Այցելուները հնարավորություն են ունեցել կրել «Եռանկյունին» ֆիլմի խորհրդանշական գոգնոցը, շփվել ֆիլմերի ստեղծման պատմությանը վերաբերող իրական ռեկվիզիտների հետ եւ զգալ ներկայացվող ստեղծագործությունների մթնոլորտը:
Լուսանկարները՝ Հայաստանի կինոյի հիմնադրամի
