Ի հիշատակ հայկական ֆուտբոլի լեգենդ Նիկիտա Սիմոնյանի՝ հայկական թիմերը խաղադաշտ դուրս կգան սև թևկապներով, տեղեկացնում է Հայաստանի ֆուտբոլի ֆեդերացիան։
Բացի այդ, ըստ գերատեսչության, Պրեմիեր լիգայի նոյեմբերի 25-ի հանդիպումը, 15-րդ տուրի, ինչպես նաև Հայաստանի առաջին խմբի առաջնության 17-րդ տուրի բոլոր հանդիպումները կմեկնարկեն 1 րոպե լռությամբ։
ԿԳՄՍՆ-ն անդրադարձել է Սիմոնյանի մահվանը՝ ընդգծելով, որ նա իր բացառիկ տաղանդով, անսպառ աշխատասիրությամբ և անկեղծ նվիրումով թողել է անջնջելի հետք համաշխարհային ու հայկական ֆուտբոլի պատմության մեջ։
«Այդ հաղթանակները մինչ օրս էլ համարվում են հայկական սպորտի ամենամեծ նվաճումներից։ Նրա բազմամյա գործունեությունը, բարձր պրոֆեսիոնալիզմը, մարդկային որակները և ֆուտբոլի հանդեպ նվիրումը միշտ կմնան սպորտի պատմության ոսկե էջերում՝ որպես օրինակ հաջորդ սերունդների համար»,- ասվում է հաղորդագրությունում։
Սիմոնյանը 2011 թվականին ՀՀ նախագահի հրամանագրով հայկական ֆուտբոլի զարգացման գործում ներդրած նշանակալի ավանդի և ծանրակշիռ ձեռքբերումների, ֆուտբոլի ասպարեզում երկարամյա արդյունավետ աշխատանքի համար պարգևատրվել էր Պատվո շքանշանով: 2013 թվականին հայկական ֆուտբոլի զարգացման գործում ներդրած նշանակալի ավանդի և փայլուն նվաճումների համար՝ «Հայրենիքին մատուցած ծառայությունների համար» 1-ին աստիճանի մեդալով, իսկ 2019 թվականին՝ «Հայրենիքին մատուցած ծառայությունների համար» 1-ին աստիճանի շքանշանով։
Նոյեմբերի 20-ին Սիմոնյանն ինքնազգացողության վատացման հետևանքով հոսպիտալացվել էր։ Նա մահացել էր 100 տարեկանում։
