ԵՐԵՎԱՆ, ՆՈՅԵՄԲԵՐԻ 21, 24News
Շատ կուզենանք, որ կիրակի օրը Նիկոլ Փաշինյանի մասնակցությամբ Արարատ գյուղի Սուրբ Հակոբ եկեղեցում նախատեսվող պատարագը լինի կանոնական: 24News-ի հետ զրույցում նման կարծիք հայտնեց Սաղմոսավանքի հոգևոր հովիվ Տեր Փառեն քահանա Առաքելյանը՝ ընդգծելով, որ ոչ մի հոգևորական իրավունք չունի որևէ բան զեղջել:
«Գիտեմ, որ Տեր Երվանդը կիրակի էնտեղ պիտի պատարագի: Մենք լիահույս ենք, որ պատարագն ամբողջական կլինի՝ առանց զեղջելու Վեհափառի մասին աղոթքի հատվածը, թե ինչ կլինի, հիմա դժվար է ասել, գուշակել չեմ ուզում»:
Տեր Փառենը նաև ընդգծեց, որ դեռ 17-րդ դարից բոլոր պատարագներին եկեղեցականները հնչեցնում են Ամենայն Հայոց Հայրապետի և թեմի առաջնորդի անունը, այդպես է նաև հիմա:
«Պատարագի մատուցման ամբողջ տեքստը մեզ տրված խորհրդատետրում է գրված, որը հիմված է մեր հոգևոր հայրերի ձեռագիր խորհրդատետրի վրա: Պատարագին Վեհափառի անունը հնչեցնելը կանոն է, այստեղ կամայականություն լինել չի կարող, անգամ իմաստ չկա»:
Հիշեցնենք, որ նոյեմբերի 15-ին Նիկոլ Փաշինյանը մասնակցել էր Խաչիկ գյուղի Սուրբ Աստվածածին եկեղեցու պատարագին, որի ժամանակ պատարագիչ հոգևորականը զեղջել էր Վեհափառի անունը հիշատակող հատվածը:
Հասմիկ Կիրակոսյան
–00—ՅՄ