Շրջակա միջավայրի նախարար Համբարձում Մաթևոսյանը հանդիպել է Ֆրանսիայի էկոլոգիական անցման, կենսաբազմազանության և կլիմայի ու բնության հարցերով միջազգային բանակցությունների նախարար Մոնիկ Բարբուի հետ։ Այս մասին տեղեկացնում են ՀՀ շրջակա միջավայրի նախարարությունից:
Քննարկել են շրջակա միջավայրի պահպանության, ջրային ռեսուրսների կառավարման, կլիմայական քաղաքականության և երկկողմ համագործակցության խորացման առաջնահերթությունները։
Հանդիպմանն անդրադարձ է կատարվել բնապանության ոլորտում 2016 թվականից սկսված Հայաստան-Ֆրանսիա արդյունավետ գործընկերությանը, որն իրականացվում է հիմնականում ԵՄ ֆինանսավորմամբ մի շարք ծրագրերի շրջանակում։
Նախարարը բարձր է գնահատել ջրային ռեսուրսների կառավարման պլանների մշակմանն ուղղված համատեղ աշխատանքը, ջրային տվյալների թվայնացման և «Էկոպորտալի» զարգացման գործընթացի շրջանակում իրականացվող աշխատանքները։
Ներկայացրել է «պարտք՝ կլիմայի դիմաց» նորարարական ֆինանսական գործիքը, որը հնարավորություն է տալիս ուղղել լրացուցիչ միջոցներ կլիմայական ծրագրերին և նպաստել ֆինանսական բեռի նվազեցմանը։
Հանդիպումն ավարտվել է պատրաստակամությամբ՝ շարունակելու սերտ համագործակցությունն՝ ուղղված շրջակա միջավայրի պահպանությանը և կլիմայական մարտահրավերներին համատեղ արձագանքելուն։
Դիտումների քանակ1