Այսօր սոցցանցերը լի են «գուրուներով», որոնք խոստանում են սովորեցնել, թե ինչպես միլիոններ վաստակել, ապրել Բալիում և աշխատել «օրական երեք ժամ՝ նոութբուքով ՝ ծովափին նստած»։ Առաջին հայացքից հեքիաթ է թվում։ Սակայն գեղեցիկ բառերի և պատկերների հետևում հաճախ թաքնվում են նույն այդ «ինֆոցիգանները»։ «Նովոստի-Արմենիա»-ն պատմում է, թե ինչպես ճանաչել նրանց և չկորցնել սեփական գումարը
ԵՐԵՎԱՆ, 17 նոյեմբերի․/Նովոստի–Արմենիա/․ Այսօր սոցիալական ցանցերը լի են «գուրուներով», որոնք խոստանում են սովորեցնել, թե ինչպես միլիոններ վաստակել, ապրել Բալիում և աշխատել «օրական երեք ժամ՝ նոութբուքով ՝ ծովափին նստած»։ Առաջին հայացքից հեքիաթ է թվում։ Սակայն գեղեցիկ բառերի և պատկերների հետևում հաճախ թաքնվում են նույն այդ «ինֆոցիգանները»։ Նրանց բիզնեսը ներդրումները, ստարտափերը կամ իրական փորձառությունը չեն։ Նրանց բիզնեսը հույսի վաճառքն է։
«Նովոստի-Արմենիա»-ն պատմում է, թե ինչպես ճանաչել նրանց և չկորցնել սեփական գումարը։
Ո՞վքեր են «ինֆոցիգանները»
«Ինֆոցիգանները» մարդիկ են, որոնք վաճառում են ոչ թե գիտելիք, այլ պատրանք։ Նրանց նպատակն է համոզել, որ հենց իրենք կբացեն ձեր առջև հեշտ փող աշխատելու դուռը, կուղեկցեն ազատության և «նոր կենսամակարդակի» աշխարհ։
Ի տարբերություն փորձագետի, «ինֆոցիգանն» իրական փորձ կամ գործնական օրինակներ չունի։ Նրա «հաջողությունը» հիմնված է բացառապես վաճառելու կարողության վրա. նախ՝ երազանք, ապա՝ հերթական դասընթաց և վերջապես՝ «սուպեր փաթեթ՝ անձնական խորհրդատվությամբ»։
Անիրատեսական խոստումներ
Հիմնական նշանը, որ գործ ունեք «ինֆոցիգանի» հետ, նրա կողմից տրվող անիրատեսական խոստումներն են։ Նրանք մեկ ամսում միլիոններ վաստակելու, մեկ շաբաթում 20 կգ նիհարելու կամ շաբաթվա վերջում նոր մասնագիտություն ձեռք բերելու խոստումներ են տալիս։ Միաժամանակ, չեն բացահայտում արդյունքի հասնելու կոնկրետ մեթոդները՝ սահմանափակվելով այնպիսի արտահայտություններով, ինչպիսին են «գաղտնի մեթոդներ»-ը կամ «բացառիկ համակարգ»-ը։
Ագրեսիվ վաճառքներ՝ ժամանակի սահմանափակումով
«Ինֆոցիգանները» ստեղծում են արհեստական դեֆիցիտ՝ «Միայն այսօր», «Վերջին 10 տեղերը», «Ակցիան ավարտվում է մեկ ժամից»։ Նրանք հաճախորդներին ժամանակ չեն տալիս իրենց գնումը դիտարկելու համար՝ ստիպելով կայացնել իմպուլսիվ որոշումներ։ Իսկական մասնագետները երբեք չեն օգտագործում նման մեթոդներ։
Կեղծ հաջողության ցուցադրում
Խարդախներն ակտիվորեն ցուցադրում են շքեղ կյանք՝ թանկարժեք մեքենաներ, ժամացույցներ, անշարժ գույք և կանխիկ գումարի կապոցներ: Սակայն, դրանք հաճախ վարձակալվում կամ պատկանում են ուրիշներին: Իրական փորձագետները հազվադեպ են ցուցադրում իրենց հարստությունը՝ փոխարենը կենտրոնանալով իրենց մասնագիտական նվաճումների վրա:
Մասնագիտացման և կրթության բացակայություն
«Ինֆոցիգանները» չունեն համապատասխան կրթություն կամ փորձ իրենց առաջխաղացման ոլորտում: Նրանք չեն կարող տրամադրել դիպլոմներ, վկայականներ կամ իրական նախագծերի պորտֆոլիոներ: Դրա փոխարեն օգտագործում են հնչեղ, բայց սին տիտղոսներ՝ «մարքեթինգի գուրու», «միլիոնատեր մենթոր»:
Լսարան գրավելու տոքսիկ մեթոդներ
Խարդախները հաճախ հոգեբանական ճնշման մեթոդներ են օգտագործում՝ ամոթանք տալով պոտենցիալ հաճախորդներին աղքատ լինելու համար, մեղադրելով նրանց ծուլության և հավակնությունների բացակայության մեջ: Նրանք իրենց շուրջը ստեղծում են անհատի պաշտամունք՝ պահանջելով անվերապահորեն հետևել իրենց խորհուրդներին:
Բարձր գներ՝ առանց երաշխիքների
«Ինֆոցիգաններն» իրենց դասընթացների և մարաթոնների համար սահմանում են չափազանց բարձր գներ՝ միևնույն ժամանակ չտալով գումարի վերադարձի երաշխիքներ։ Բարձրորակ կրթական պրոդուկտները միշտ ունեն ողջամիտ գներ և գումարի հետ վերադարձի քաղաքականություն:
Ինչպես պաշտպանվել
Ստուգեք տեղեկատվությունը: Ուսումնասիրեք հեղինակի կենսագրությունը, գտեք իրական ուսանողների կարծիքները, ոչ թե միայն վաճառողի էջի դրական մեկնաբանությունները:
Պահանջեք մանրամասներ: Իսկական փորձագետը միշտ կարող է բացատրել իր մեթոդները և ներկայացնել կոնկրետ օրինակներ և ուսումնասիրություններ:
Մի՛ ենթարկվեք ճնշմանը: Ժամանակ տվեք ինքներդ ձեզ՝ գնում կատարելու վերաբերյալ մտածելու համար: Խորհրդակցեք ընկերների կամ գործընկերների հետ:
Փնտրեք այլընտրանքներ: Հաճախ նույն տեղեկատվությունը կարելի է ստանալ անվճար կամ շատ ավելի էժան՝ ստուգված աղբյուրներից:
Վստահեք ձեր ինտուիցիային: Եթե ինչ-որ բան կասկածելի է թվում, ապա ավելի լավ է հրաժարվել առաջարկից:
Հիշե՛ք. չկան արագ հարստանալու կախարդական սխեմաներ: «Ինֆոցիգանները» վաճառում են հույս: Փորձագետները վաճառում են գիտելիք: Առաջինն ասում է. «Հեշտ է լինելու», երկրորդն ասում է. «Դժվար կլինի, բայց արդյունքները կարդարացնեն ներդրվող ջանքերը»:
«Ինֆոցիգանի» դեմ գլխավոր զենքը քննադատական մտածողությունն է: Եթե սովորեք ճիշտ հարցեր տալ և չընկնեք «հաջողության» խոստումների հետևից, ապա ոչ մի «կախարդական դեղահաբ» սպառնալիք չի լինի ձեզ համար:
Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների զորակցման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։