«Քաղաքացիական պայմանագիր» կուսակցությունը հաղթանակ տարավ Վաղարշապատի (Էջմիածնի) խոշորացված համայնքի ավագանու ընտրություններում՝ ստանալով ձայների 48.5%-ը։ ԿԸՀ-ն, ամփոփելով բոլոր տեղամասերի արդյունքները, հայտնեց, որ իշխող ուժը ստանում է 33 մանդատից 19-ը, ինչը նրան թույլ է տալիս քաղաքային իշխանությունը ձևավորել առանց կոալիցիա կազմելու։
Կենտրոնական ընտրական հանձնաժողովը հրապարակել է Վաղարշապատի խոշորացված համայնքի բոլոր 47 ընտրական տեղամասերի քվեարկության վերջնական արդյունքները։
Ըստ ամփոփ տվյալների՝ անհրաժեշտ շեմը հաղթահարել և համայնքի ավագանու անդամ են դառնում երեք քաղաքական ուժեր.
«Քաղաքացիական պայմանագիր» կուսակցություն՝ 15 298 ձայն (48.5%)
«Հաղթանակ» կուսակցությունների դաշինք՝ 10 051 ձայն (31.9%)
«Մայր Հայաստան» կուսակցություն՝ 1 692 ձայն (5.4%)
Մնացած հինգ քաղաքական ուժերը, այդ թվում՝ «Հանրապետությունը», «Ազատ դեմոկրատները» և «Ժառանգությունը», չեն կարողացել հաղթահարել անցողիկ շեմը։
Այսպիսով, Վաղարշապատի ավագանու 33 մանդատները բաշխվում են հետևյալ կերպ.
«Քաղաքացիական պայմանագիր»՝ 19 մանդատ
«Հաղթանակ» դաշինք՝ 12 մանդատ
«Մայր Հայաստան»՝ 2 մանդատ
Ստանալով 19 մանդատ՝ «Քաղաքացիական պայմանագիրն» ապահովել է բացարձակ մեծամասնություն ավագանիում։ Սա նշանակում է, որ կուսակցությունը կարող է միանձնյա և առանց այլ ուժերի հետ դաշինք կազմելու նշանակել համայնքի ղեկավարին։
Ընտրողների ցուցակներում ընդգրկվածների ընդհանուր թիվը կազմել է 69 866 մարդ։