1lurer. Ես ուզում եմ ձեզ հիշեցնել, որ ընդդիմությունն ասում էր՝ սա միակողմանի ապաշրջափակում է, և Հայաստանի համար ոչինչ չի ապաշրջափակվելու, որ Հայաստանը մնալու է շրջափակման մեջ, Հայաստանը միակողմանի զիջումներ է արել, Ադրբեջանի համար է միայն ապաշրջափակումը, իսկ հիմա նրանք քննարկում են, թե ցորենը որ կարգի է: Այս մասին խորհրդարանում՝ ճեպազրույցում, հայտարարեց ԱԺ նախագահի տեղակալ Ռուբեն Ռուբինյանը՝ ի պատասխան լրագրողների դիտարկումների, թե ընդդիմությունը իշխանությանը մեղադրում է 4-րդ կարգի ցորեն բերելու ու կատարվածը թմբկահարելու մեջ:
«Սա, կարծում եմ, արդեն իսկ խոսուն է, իսկ ընդհանրապես, ես ցորենի մասնագետ չեմ, իսկ Ռուսաստանի ցորենի որակը նրանց (ընդդիմությանը – խմբ.) բավարարո՞ւմ է»,- ասաց նա՝ խորհուրդ տալով հարցնել Էկոնոմիկայի նախարարությանը:
Հիշեցնենք՝ ղազախական ցորենով բեռնված գնացքը Հայաստանում է՝ անցնելով Ղազախստանի, Ռուսաստանի, Ադրբեջանի և Վրաստանի տարածքով։
Օրերս Ադրբեջանի և Վրաստանի տարածքով՝ գնացքով, Հայաստան էր տեղափոխվել նաև ՌԴ-ից ձեռք բերված ցորենը։
Հեղինակ`Կարմեն Ղուկասյան