Քաղաքագետ Հակոբ Բադալյանն իր տելեգրամյան ալիքում գրում է. «Արդարադատության նախարարը կրկնում է, որ Սահմանադրության փոփոխության հարցը Հայաստանում օրակարգային է 2018-ից հետո եւ այն ոչ մի երրորդ երկրի պահանջ չէ:
Շատ լավ, առաջնորդվենք այդ տրամաբանությամբ: Այդ դեպքում կա թերեւս մի պարզ ցուցիչ՝ Անկախության հռչակագրի հղումը: Եթե Սահմանադրության փոփոխությունը թելադրված է ներքին օրակարգից բխող անհրաժեշտություններով, ապա որեւէ կերպ չպետք է «տուժի» Անկախության հռչակագրին արվող հղումը: Որովհետեւ, գիտենք, որ հենց այդ հղումն է Ադրբեջանի մատնացույց արած խնդիրն ու պահանջը:
Ըստ այդմ, կա պարզ մի հարց՝ հռչակագրի հղմանը իշխանությունը դիպչելու՞ է, թե՞ ոչ: Ինքնին այն, որ այդ հարցում չկա միարժեք «ոչ» պատասխան, իսկ Անկախության հռչակագիրն էլ բարձր մակարդակով «վերահռչակվել» է կոնֆլիկտային կամ կոնֆլիկտահեն, դա արդեն իսկ վկայում է, որ ներքին օրակարգի մասին հավաստիացումները պարզապես քող են, ընդ որում խիստ թափանցիկ:
Իսկ Սահմանադրության փոփոխությունը օրակարգում է Ադրբեջանի պահանջով»: