Google-ի մայր ընկերությունը հանդիսացող Alphabet Inc. ընկերության մաքուր շահույթը տարվա երրորդ եռամսյակում ավելացել է 33%-ով, իսկ եկամուտը՝ 16%-ով՝ հասնելով պատմական առավելագույն մակարդակի։
Հուլիսից սեպտեմբեր ընկած ժամանակահատվածում Alphabet-ի մաքուր շահույթը կազմել է 34.98 միլիարդ դոլար՝ նախորդ տարվա նույն ժամանակահատվածի 26.3 միլիարդի դիմաց։
Շահույթը մեկ բաժնետոմսի հաշվով աճել է 2.12 դոլարից մինչև 2.87 դոլար։
Ընկերության եռամսյակային եկամուտը կազմել է 102.3 միլիարդ դոլար՝ նախորդ տարվա 88.3 միլիարդի փոխարեն։
FactSet-ի հարցման համաձայն՝ վերլուծաբանները միջինում կանխատեսում էին, որ Alphabet-ի մաքուր շահույթը մեկ բաժնետոմսի հաշվով կլինի 2.12 դոլար, իսկ եկամուտը՝ 99.94 միլիարդ դոլար։
Google-ի գովազդային եկամուտները հաշվետու եռամսյակում աճել են 13%-ով՝ հասնելով 74.18 միլիարդ դոլարի՝ նախորդ տարվա 65.85 միլիարդի փոխարեն։
Այդ թվում՝ որոնողական համակարգի գովազդային եկամուտը կազմել է 56.6 միլիարդ դոլար, ինչը 15%-ով ավելի է, քան նախորդ տարի։
YouTube-ի գովազդային եկամուտները նույնպես աճել են 15%-ով՝ հասնելով 10.3 միլիարդ դոլարի։
Google Cloud ծառայության եկամուտն աճել է 34%-ով՝ հասնելով 15.16 միլիարդ դոլարի՝ արհեստական բանականության ոլորտում գործառնությունների արագ ընդլայնման ֆոնին։
LSEG-ի վերլուծաբանները սպասում են, որ Google Cloud-ի եկամուտը կկազմի 14.72 միլիարդ դոլար։
Alphabet-ը հայտնել է, որ Gemini չաթբոտի ամսական ակտիվ օգտատերերի թիվը գերազանցել է 650 միլիոնը։
Ընկերությունը նաև բարձրացրել է ընթացիկ տարվա կապիտալ ներդրումների կանխատեսումը՝ 85 միլիարդ դոլարից մինչև 91-93 միլիարդ դոլար, նշելով, որ աճում է պահանջարկը իր ամպային ծառայությունների նկատմամբ։
2025 թվականի սկզբից ի վեր՝ Alphabet-ի շուկայական արժեքն աճել է 45%-ով։
Տեխնոլոգիական հրապարակումներն իրականացվում են Իդրամի աջակցությամբ։