Ջրային կոմիտեի (ՋԿ) նախագահ Արամազդ Ղալամքարյանը և ՋԿ նախագահի տեղակալ Մարտիրոս Նալբանդյանը աշխատանքային այցով Շիրակի, Արագածոտնի և Արմավիրի մարզերում էին։
Այցի հիմնական նպատակն էր տեղում ծանոթանալ Ախուրյան և Արաքս գետերի, ինչպես նաև մի շարք ներկա և ապագա ջրամբարների ու ջրանցքների տեխնիկական վիճակին, շահագործման գործընթացներին ու առկա խնդիրներին։
Շիրակի մարզում Ղալամքարյանը և Նալբանդյանը եղել են Ախուրյանի ջրամբարում, որտեղ ջրամբարի շահագործման հայ-թուրքական մշտական հանձնաժողովի ՀՀ պատասխանատուների ուղեկցությամբ շրջել են ջրամբարի տարածքով, քննարկել ընթացիկ խնդիրները և առկա ֆինանսավորման պայմաններում դրանց լուծման հնարավորությունները։
Ախուրյան գետի ափամերձ շրջանում պաշտոնյաները դիտարկել են գետի հունը, ներկայում չօգտագործվող ջրանցքը և ափամերձ գոտու որոշակի հատվածներ։ Մասնագետների կողմից առաջարկվել է ուսումնասիրել ոռոգման ջուրը նշված տարածքներից Հանրապետության այլ շրջաններ տեղափոխելու, ինչպես նաև սահմանամերձ գոտու հայաստանյան հատվածում ենթակառուցվածքների և սարքավորումների արդիականացման տարբերակներ։
Այնուհետև աշխատանքային այցը շարունակվել է Արագածոտնի մարզում, որտեղ Ղալամքարյանը և Նալբանդյանը հանդիպել են Թալինի ջրօգտագործողների ընկերության տնօրեն Անդրանիկ Սափեյանի և այլ պատասխանատուների հետ։
Քննարկվել են ջրային համակարգերի կառավարման արդյունավետության բարձրացման և հավաքագրումների ավելացման, ոռոգման ցանցերի արդիականացման և կորուստների նվազեցման հնարավոր ուղիները։
Արմավիրի մարզում Կոմիտեի ղեկավար կազմն այցելել է նաև Արմավիրի մայր ջրանցքի գլխամաս (Սարդարապատի հիդրոհանգույց), Արաքս գետի ափամերձ շրջան, ինչպես նաև Շենիկ ՋՕԸ-ի Ղարաղալա-2 պոմպակայան։
Քննարկվել են ոռոգման ջրի գոյություն ունեցող ծավալների նպատակային հատկացումը ջրօգտագործողներին, վերահսկողական գործիքակազմի առավել արդյունավետ կիրառումը և մոնիթորինգի շարունակական իրականացումը, առանձնացվել են հրատապ լուծումներ պահանջող հարցերը, նախանշվել՝ դրանց հասցեագրման ժամկետները և պատասխանատուները։
Դիտումների քանակ11