Լիտվայի և Բելառուսի սահմանին գտնվող «Մյադինինկայ» և «Շալչինինկայ» ցամաքային անցակետերը հոկտեմբերի 26-ի ժամը 22:10-ից փակվել են օդապարիկների ներթափանցման պատճառով, հայտնել են Լիտվայի սահմանապահ ծառայությունից։ Լիտվայի ներքին գործերի նախարար Վլադիսլավ Կոնդրատովիչը պարզաբանել է, որ Բելառուսի հետ սահմանի անցակետերը որոշվել է փակել «անորոշ ժամանակով»՝ մինչև ազգային անվտանգության հանձնաժողովի կողմից առանձին որոշման կայացումը։
Բելառուսի կողմից օդապարիկների պատճառով գիշերը դադարեցվել էր նաև Վիլնյուսի օդանավակայանի աշխատանքը՝ ավելի քան վեց ժամով։ Ժամը 04:30-ին օդային երթևեկությունը վերականգնվել է։ Այդ ընթացքում 13 չվերթ չեղարկվել է, 14-ը՝ ուղղորդվել այլ օդանավակայաններ և 20-ը՝ հետաձգվել։ Չեղարկումներն ու հետաձգումներն ազդել են ավելի քան յոթ հազար ուղևորի վրա։
Հոկտեմբերի 20-ից 26-ը Վիլնյուսի օդանավակայանը երեք անգամ դադարեցրել է գործունեությունը Բելառուսից Լիտվա մուտք գործող մաքսանենգ օդապարիկների պատճառով: Իշխանությունները նաև ժամանակավորապես փակել են Բելառուսի հետ Մեդինինկայի և Շալչինինկայի ցամաքային սահմանային անցակետերը, սակայն առավոտյան տրանսպորտային միջոցներին կրկին թույլատրվել է մուտք գործել:
Լիտվայի նախագահ Գիտանաս Նաուսեդան հոկտեմբերի 26-ին առաջարկել է քննարկել Կալինինգրադի մարզի տարանցումը սահմանափակելու հարցը, եթե Բելառուսի կողմից մաքսանենգ ապրանքներով օդապարիկները շարունակեն ներթափանցել երկրի օդային տարածք։ Հոկտեմբերի 28-ին Նաուսեդան գերատեսչական խորհրդակցություն է հրավիրել հարցը քննարկելու համար։