Փարիզում տասը մարդ կկանգնի դատարանի առաջ՝ Ֆրանսիայի նախագահ Էմանուել Մակրոնի կնոջ՝ Բրիջիտ Մակրոնի նկատմամբ կիբերհարձակման մեղադրանքով, հայտնում է «ՌԻԱ Նովոստին»՝ հղում անելով Agence France-Presse-ին։
«Ութ տղամարդ և երկու կին երկուշաբթի և երեքշաբթի օրերին Փարիզի քրեական դատարանում կդատվեն Բրիջիտ Մակրոնի նկատմամբ սեքսիստական կիբերհարձակման համար», – նշվում է հոդվածում։
Գործակալությունը պարզաբանել է, որ դատավարությունը կապված է Ֆրանսիայի առաջին տիկնոջ սեռի և սեռական կողմնորոշման, ինչպես նաև նրա և իր ամուսնու միջև տարիքային տարբերության վերաբերյալ բազմաթիվ առցանց հայտարարությունների հետ, որոնք մեկնաբանները հավասարեցնում են պեդոֆիլիայի հետ։
Մեղադրյալների թվում են գրող Օրելիեն Պուարսոն-Ատլանը, որը հայտնի է Զոե Սագան կեղծանունով, և Ամանդին Ռուան (իրական անունը՝ Դելֆին Ժեգյուս), որի YouTube ալիքում լրագրող Նատաշա Ռեյը մեղադրանքներ է ներկայացրել Բրիջիտ Մակրոնի սեռի վերաբերյալ։
Գործակալությունը հիշեցնում է, որ հետաքննությունը սկսվել է, երբ նախագահի կինը 2024 թվականի օգոստոսին բողոք է ներկայացրել։ Հայտնի չէ՝ նա կմասնակցի՞ դատավարությանը, թե՞ ոչ։ Մեղադրյալները կարող են մինչև երկու տարվա ազատազրկման դատապարտվել։
Ֆրանսիայի առաջին տիկնոջ սեռի մասին լուրերը բազմիցս ոգեշնչել են բազմաթիվ առցանց հրապարակումներ։ Թեմայի նկատմամբ հետաքրքրությունը խթանվել է ամերիկացի լրագրող Քենդիս Օուենսի Բրիջիտ Մակրոնի մասին վավերագրական ֆիլմի շնորհիվ, որը նոր քննարկումների ալիք է առաջացրել և նախագահական զույգին դրդել է նրան դատի տալ զրպարտության համար։
Լրագրողը պնդել է, որ Ֆրանսիայի առաջին տիկինը ծնվել է որպես տղամարդ՝ Ժան-Միշել Տրոնյո անունով։ Փաստաբան Թոմ Քլերը հայտարարել էր, որ Մակրոնները պատրաստ են ԱՄՆ դատարանին ներկայացնել լուսանկարներ և «գիտական» ապացույցներ, որոնք հաստատում են, որ Բրիջիտը ծնվել է կին։
