ՀՀ իշխանությունները նախատեսում են կազմակերպել առնվազն 10 000 մարդու մասնակցություն կարգալույծ քահանա Արամ Ասատրյանի (այժմ՝ աշխարհիկ Ստեփան) կողմից կիրակի՝ հոկտեմբերի 26-ին մատուցվելիք պատարագին, հաղորդում է «Հրապարակ» թերթը՝ հղում անելով աղբյուրներին։
Լրատվականի տեղեկություններով՝ Արագածոտնի մարզպետին հանձնարարվել է համակարգել մասնակիցների ավտոբուսային տեղափոխումը Հովհաննավանք, որտեղ նախատեսված է պատարագը։
Ինչպես նշում է «Հրապարակը», ակցիայի նպատակն է ցույց տալ իշխանությունների հակաեկեղեցական քաղաքականությանը զանգվածային աջակցությունը, ինչպես նաև այն, որ «մարդիկ Հայաստանի տարբեր շրջաններից եկել են կաթողիկոսի կողմից հալածվող քահանային աջակցելու»։
Ասատրյանը հոկտեմբերի 21-ին հայտարարել էր, որ Հովհաննավանքում պատրաստվում է պատարագ մատուցել։ Նույն օրը վարչապետ Նիկոլ Փաշինյանը տեղեկացրել էր, որ մասնակցելու է պատարագին։ ԱԺ-ում էլ վերահաստատել էր դիրքորոշումը՝ նշելով, որ ոչ թե Ասատրյանն, այլ Գարեգին Բ-ն է «կարգալույծ»։ Հոկտեմբերի 23-ին Ասատրյանը մերժել էր եկեղեցու ծանուցումը:
