«Այդ օրը կյանքում չեմ մոռանա, ես դրսում խաղում էի երեխաների հետ, տեսա Շտապօգնության մեքենա ու ինչպես բոլոր երեխաները ես էլ վազեցի, որ տեսնեմ ինչ է պատահել: Տեսա, որ հայրիկիս պատգարակի վրա դուրս են տանում: Ինձ արագ տարան, ու չհասցրեցի ինչ-որ բան հասկանալ: Հետո արդեն թաղմանը եկա, 8 տարեկան էի ու առանձնապես ոչինչ չէի հասկանում: Բայց, երբ մուտք գործեցի սենյակ, որտեղ դրված էր դագաղը, այդ ժամանակ հասկացա, որ շատ վատ բան եղավ իմ կյանքում: Ինձ հեռու պահեցին մնացած արարողություններից, ես ինչ-որ մեկի տանն էի: Երբ հասկացա, թե ինչ կատարվեց, դա բավական մեծ տարիքում էի:
Դրանից հետո ավելի դաժան բան կատարվեց: Հայրիկիս բարեկամները որոշեցին, որ մենք այլևս չպետք է այդ տանն ապրենք, որտեղ ես մեծացել էի: Քանի որ մայրիկիս մյուս տունը կար, նրանք մեզ բավական կոպիտ ձևով խնդրեցին, որ մենք դուրս գանք այդ տնից: Փչացան հարաբերությունները հորաքրոջս և նրա աղջկա հետ: Պապիկիս քույրը եկավ ու հայտնեց մայրիկիս, որ նրանք այլևս չեն ուզում տեսնել ինձ: Պատճառը ոչ ոք չհասկացավ: Երբ տանից դուրս եկանք, մայրս մտածում էր, թե ես քնած եմ, բայց ես լսում էի՝ ինչպես է նա արտասվում ու դա երբեք չեմ կարող մոռանալ: Հասկացա, որ ես շատ շուտ՝ 11 տարեկանում մեծացա»,- Tete A Tete հաղորդման շրջանակներում պատմել է երգչուհի Մայա Մարգարյանը: Հայտնում է Tert.am-ը: