«Ձեր հայրենիք Ակնան այլևս հայկական չէ. դուք հա՞շտ եք դրա հետ»,- «ԱրմԼուր»-ի հետ զրույցում հարց ուղղվեց ԱԺ նախագահ Ալեն Սիմոնյանին՝ անդրադառնալով 2020 թվականին նրա արած գրառմանը, որում նա գրել էր. «Ակնան (Աղդամը) իմ հայրենիքն է»:
«Դա քաղաքական հայտարարություն էր և հարված էր Սերժ Սարգսյանի ասածին՝ որպես հակադրում, որը որ ասում էր, որ դա իմ հայրենիքը չի, և նա նկատի չուներ, որ ինքը այնտեղ չի ծնվել: Նրա ասելիքը հետևյալն էր. որ ինքը պատրաստ է դա զիջել: Իսկ իմ հայտարարությունը նրա մասին էր, որ ես պատրաստ չեմ դա զիջել»,- պատասխանել է ԱԺ նախագահը:
Նա նշել է, որ իր գրառումը չէր նշանակում, որ ինքը այնտեղ է ծնվել, որ դա քաղաքական դիրքորոշման փոփոխություն է: «Ես այն ժամանակ մտածել եմ այդպես և պատասխանել եմ Սերժ Սարգսյանին: Եվ հիմա այն մարդիկ, ովքեր դա փորձում են ինձ մեղադրանք ներկայացնել, քաղաքականապես բոբիկ, անիմաստ գործողությամբ են զբաղված»,- ընդգծել է նա: