Վերջին շրջանում ստացել ենք բազմաթիվ բողոքներ Հայաստան ժամանող զբոսաշրջիկներից, ովքեր հայտնում են, որ օդանավակայանից հյուրանոց տեղափոխվելիս տաքսի վարորդները գանձել են ճանապարհի իրական արժեքից կրկնակի և եռակի բարձր գումարներ։
Տարիներ շարունակ արձանագրվում են նմանատիպ դեպքեր, երբ Հայաստան ժամանող զբոսաշրջիկները տաքսի ծառայություններից օգտվելիս հաճախ դառնում են անհամաչափ և անարդարացի բարձր գների զոհ ՝ օդանավակայանից մինչև հյուրանոցներ տեղափոխվելու ժամանակ։ Ի դեպ, աստղաբաշխական այդ սակագները սահմանել են, այսպես կոչված, «փափախչիները». նրանք հերթապահում են օդանավակայանի սպասասրահում և տերմինալից դուրս եկող «նորաթուխ» զբասաշրջիկին համոզելով նստեցնում են իրենց մեքենան։ Այսպիսով վտանգվում է ոչ միայն զբոսաշրջիկի քսակի պարունակությունը, այլ հենց վերջինիս ապահովությունը։ Այդ պատճառով նպատակահարմար է օգտվել հենց «Զվարթնոց» օդանավակայանում գրանցված տաքսի-ծառայությունից, քանի որ դրանց շարժը ֆիքսված է րոպե առ րոպե՝ գրաֆիկով։ Նշենք, որ այս իրավիճակը ձևավորվել է այն պատճառով, որ ոլորտը մինչ օրս օրենքով պատշաճ կերպով կարգավորված չէ, բացակայում է հստակ վերահսկողություն և կարգապահական մեխանիզմներ։ Բացի այդ, օդանավակայանը և պետական համապատասխան մարմինները երկար տարիներ չեն ձեռնարկել բավարար միջոցներ՝ վերահսկելու և կարգավորելու այս գործընթացը։
Այս իրավիճակը տարիներ շարունակ մնում է առանց պատշաճ կարգավորման և պահանջում է անհապաղ արձագանք ու ինստիտուցիոնալ կարգավորում։ Նման անփութությունը լրջորեն վնասում է Հայաստանի միջազգային հեղինակությանը և զբոսաշրջիկների վստահությանը մեր երկրի նկատմամբ։ Ուստի անհրաժեշտ է հարցը դիտարկել ինստիտուցիոնալ մակարդակով և ձեռնարկել անհապաղ քայլեր՝ վերահսկողության, պատասխանատվության և կարգավորման հստակ մեխանիզմներ սահմանելու համար, որպեսզի կանխվեն նմանատիպ դեպքերը։ Լավ կլիներ, որ օդանավակայանի ներսում, մինչ սպասասրահ դուրս գալը, զբոսաշրջիկներին զգուշացվեր, որ օգտվեն միայն օդանավակայանի տաքսի սերվիսի ծառայություններից։
Աղբյուրը՝ araratnews.am