Փաշինյանն անընդհատ փորձում է արդարանալ ու մոլորեցնել մարդկանց․ Արմեն Այվազյան

Քաղաքական գիտությունների դոկտոր Արմեն Այվազյանը ֆեյսբուքյան իր էջում գրել է․

«Փաշինյանն անընդհատ փորձում է արդարանալ ու մոլորեցնել մարդկանց։ Հիմա էլ՝ թե «1994 թվականից ի վեր, այսինքն հրադադարից հետո, մեկնարկի պահից՝ բանակցային գործընթացը եղել է Լեռնային Ղարաբաղը Ադրբեջանի կազմ վերադարձնելու մասին»։ Սուտ է և կեղծիք։ Այդպես չի եղել, որովհետև, նախ, օրենսդրորեն արգելված էր նման նպատակով բանակցել՝

1) 1989 թ. դեկտեմբերի 1-ին ՀԱՅԿԱԿԱՆ ԽՍՀ ԳԵՐԱԳՈՒՅՆ ԽՈՐՀՐԴԻ ԵՎ ԼԵՌՆԱՅԻՆ ՂԱՐԱԲԱՂԻ ԱԶԳԱՅԻՆ ԽՈՐՀՐԴԻ ՀԱՅԿԱԿԱՆ ԽՍՀ-Ի ԵՎ ԼԵՌՆԱՅԻՆ ՂԱՐԱԲԱՂԻ ՎԵՐԱՄԻԱՎՈՐՄԱՆ ՄԱՍԻՆ ՀԱՄԱՏԵՂ ԸՆԴՈՒՆԱԾ ՈՐՈՇՄԱՄԲ,

2) Հայաստանի Հանրապետության Գերագույն խորհրդի 1992 թ. հուլիսի 8-ի որոշմամբ «Հայաստանի Հանրապետության համար անընդունելի է համարվում միջազգային կամ ներպետական ցանկացած փաստաթուղթ, որտեղ Լեռնային Ղարաբաղի Հանրապետությունը նշված կլինի Ադրբեջանի կազմում»։ ՀՀ օրենսդիր մարմինը նման որոշում էր կայացրել՝ «հիմնվելով միջազգային իրավունքի հիմնադրույթների, ազգերի ինքնորոշման իրավունքի, ինչպես նաեւ Լեռնային Ղարաբաղի Հանրապետության անկախության մասին 1991 թվականի դեկտեմբերի 10-ի հանրաքվեի արդյունքների վրա»։

Ամեն ինչից զատ, մինչև 1999 թ. ողջ էր Վազգեն Սարգսյանը, հետևաբար որևէ բանակցություն այդ ուղղությամբ տարվել չէր կարող։ Սակայն Վ. Սարգսյանի սպանությունից հետո էլ նման ուղղությամբ բանակցություններ չեն տարվել։ Միակ բացառությունը կարող է լինել ինքը Փաշինյանը։

Սակայն հայ ժողովուրդը նրան երբեք չի լիազորել բանակցել Արցախն Ադրբեջանի կազմի մեջ «վերադարձնելու» մասին։ Եթե ՀՀ որևէ պաշտոնյա երբևէ այդպիսի բանակցություններ է վարել, ուրեմն պետք է ենթարկվի քրեական պատասխանատվության՝ ՀՀ օրենսդրության համապատասխան։

Ծառայելով օտար տերերին՝ Փաշինյանը լրիվ մոռացել է, թե ինքն ում շահերը պետք է ներկայացնի արտաքին աշխարհի հետ հարաբերություններում…»։