Վերջին տարիներին ՄԻԵԴ-ը կարևոր որոշումներ է կայացրել 2008 թվականի Մարտի 1-ի հետևանքով անազատության դատապարտված քաղաքական գործիչների վերաբերյալ: 2008 թվականի Մարտի 1-ին ես ընդդիմության շարքերում էի, հետո ստիպված էի ընդհատակ անցնել, հետո՝ կամավոր կերպով դուրս գալ ընդհատակից, որից հետո կալանավորվեցի և դատապարտվեցի 7 տարվա ազատազրկման: Այդ ամբողջ ընթացքում ես ինքս անհամբերությամբ էի սպասում ԵԽԽՎ-ից և ՄԻԵԴ-ից եկող լուրերին: ԵԽԽՎ-ում հնչող ելույթներն ու ընդունվող բանաձևերը մեզ՝ Հայաստանում ժողովրդավարության համար պայքարողներիս, հույս էին տալիս ու ուժ: Այդ մասին ԵԽԽՎ-ում իր ելույթի ժամանակ ասաց ՀՀ վարչապետ Նիկոլ Փաշինյանը:
«Չեմ մոռանա այն օրը, երբ բանտում ինձ այցելեց ԵԽ մարդու իրավունքների գլխավոր հանձնակատարը: Ի վերջո՝ 2011-ին, բանտից ազատ արձակվեցի հենց Եվրոպայի խորհրդի, ԵԽԽՎ-ի, ՄԻԵԴ-ի հետևողականության շնորհիվ՝ 7 տարվա փոխարեն անազատության մեջ մնալով 1 տարի 11 ամիս»,- ասաց նա:
Փաշինյանը հիշեցրեց, որ 2018-ի մայիսին, երբ Հայաստանում տեղի ունեցավ թավշյա հեղափոխությունը, որի արդյունքում դարձավ ՀՀ վարչապետ, ՄԻԵԴ-ը, որին Փաշինյանն իր գործով դիմել էր 2010-ին, իր վճիռը դեռ չէր հրապարակել:
«Վարչապետի պաշտոնում ինձ համար ՄԻԵԴ վճիռն ավելի մեծ կարևորություն ստացավ, որովհետև եթե ՄԻԵԴ-ը որոշեր, որ 2009-ին Հայաստանում իմ դեմ կայացված դատավճիռն անարդար է, դա իմ գործը վերանայելու այնպիսի հիմք կտար, որ ոչ ոք չէր կարողանա ասել, թե վարչապետի՝ իմ կարգավիճակի պատճառով է, որ նման վճիռ է կայացվել, և արդարությունն ու արդարադատությունը կլինեին լեգիտիմ: Բարեբախտաբար, այսպես էլ եղավ: ՄԻԵԴ վճիռը լիովին լեգիտիմ և անառարկելի դարձրեց իմ հետագա արդարացումը Հայաստանի դատարանում: Այս նույն ձևով արդարացվեցին ՀՀ բազմաթիվ այլ քաղբանտարկյալներ:
Այս ամենն ասում եմ ոչ միայն կամ ոչ այնքան իմ շնորհակալությունն արտահայտելու, որքան ի ցույց դնելու համար, որ Եվրոպայի խորհուրդը և նրա կառույցները Հայաստանի պետական ինստիտուտների օրգանական շարունակությունն են: Ես ու բազմաթիվ մարդիկ, Եվրոպայի խորհուրդը և դրա ինստիտուտներն օտարերկրյա կազմակերպություն չենք համարում: Եվրոպայի խորհուրդը մեր կազմակերպությունն է, մեր ժողովրդավարության կարևորագույն ինստիտուտներից մեկը, որովհետև մենք նրա լիարժեք անդամն ենք: Այդպիսին են նաև ԵԽԽՎ-ն, ՄԻԵԴ-ը, Վենետիկի հանձնաժողովը:
Մեր անդամակցությունը ԵԽ-ին մեզ ավելի մեծ վստահություն է տալիս ժողովրդավարական բարեփոխումներ իրականացնելիս, որովհետև գիտենք՝ եթե սխալվենք, կա մեզ հարազատ, մեր կազմակերպություն, որը մեզ կահազանգի այդ մասին, կօգնի մեզ գտնել ճիշտ ուղղությունը ժողովրդավարության՝ ցավոք, գնալով ավելի դժվար դարձող ճանապարհին:
Եվրոպայի խորհուրդը մեր տունն է, որտեղ մենք հասցե ենք ստանում՝ որպես ժողովրդավարական պետություն: Լինելով փոքր երկիր՝ մենք այստեղ մի մեծ, գեղեցիկ, լուսավոր ընտանիքի մաս ենք դառնում, որտեղ մարդն ամենակարևոր արժեքն է, որտեղ մարդը նպատակ է, ոչ թե միջոց: Այս ընտանիքը կարևոր է մեզ համար: Եվրոպայի խորհուրդը մի տեղ է, որտեղ մենք կարող ենք կիսել մեր հաջողությունների ուրախությունը ու պատմել մեր անհաջողությունների մասին, լսել ուրիշների հաջողությունների պատմությունը դրանցով ոգևորվելու համար, և ուրիշների անհաջողությունների պատմությունները՝ դրանք չկրկնելու համար»,- ասաց նա: