Շվեդիայի զինված ուժերի գլխավոր հրամանատար Միխայել Քլասոնը չի բացառում, որ իր օդաչուները կարող են խոցել երկրի օդային տարածությունը խախտող ռուսական ինքնաթիռները: Այս մասին տեղեկացնում է SVT-ն։
Նրա խոսքով՝ մարտական կրակ բացելու որոշումն ընդունում է այն օդաչուն, ով բախվում է Շվեդիայի սահմանի սպառնալիքի հետ։
«Իմ գնահատմամբ, մեր օդաչուներն ունեն ինչպես պատրաստվածություն, այնպես էլ փորձ՝ հենց այսպիսի իրավիճակներում գործելու համար», – ասել է Քլասոնը։
Հրամանատարը չի բացառում իրադարձությունների նման զարգացումը, բայց այս պահին դա հավանական չի համարում։
«Ես չեմ կարծում, թե Ռուսաստանը ցանկանում է պատերազմի մեջ մտնել ՆԱՏՕ-ի հետ։ Կարծում եմ՝ նրանք ցանկանում են քաղաքականապես պառակտել ՆԱՏՕ-ն և ցույց տալ մեր թույլ կողմերը, օգտագործել դրանք իրենց շահերի համար և վախ տարածել մեր բնակչության շրջանում», – հայտարարել է նա։