Քաղաքական վերլուծաբան Վարդան Բալյանի ֆեյսբուքյան գրառումը. «2026 թվականի նախընտրական ընտրարշավը փաստացի արդեն մեկնարկել է, ինչը, կարծում եմ, տեսանելի է արդեն շատերին: Իշխանական և ընդդիմադիր ճամբարներում հստակ դիտարկելի են որոշակի դիրքավորումներ, որոնք կարելի է ասել կանխորոշիչ են լինելու հիմնական թիմերի ընտրական ռազմավարության ու մարտավարության տեսանկյունից:
Հետաքրքիր փոփոխության է ենթարկվել Նիկոլ Փաշինյանի կերպարը, որ վերջանակապես տեղավորվել է կառավարչի, տիրակալի արխետիպում: Խոստովանեմ, որ ՔՊԿ-ի քաղտեխնոլոգների թիմը բավականին գրագետ է գործում՝ չնայած այս լուծումը միանգամայն կանխատեսելի էր և, ըստ էության, միակ արդյունավետ ընտրությունը հնարավոր տարբերակներից:
Սամվել Կարապետյանի համար կերտվում է Հովանավորի և Հրաշագործի արխետիպերի համադրումով ընդհանրական կերպար, որ ասոցացվում է ծառայության՝ ժողովրդին, ազգին, պետությանը, և ուժի հետ: Հատկանշական է, որ Կարապետյանի քաղտեխնոլոգների թիմը ակնհայտորեն դեռ փնտրտուքի մեջ է, որովհետև ձևավորվող կերպարում տեսանելի են նաև Անմեղի, Հերոսի և մի քանի այլ արխետիպերի հատկանիշներ: Չի բացառվում, որ այս մոտեցումը գիտակցված ու հաշվարկված քայլ է, որի նպատակն է պոտենցիալ ընտրազանգվածին ներգրավել վերջնական կերպարի ձևավորմանը:
Էական տրանսֆորմացիայի է ենթարկվել Ռոբերտ Քոչարյանի կերպարը, որ 2021 թվականին Հերոսի ու Կառավարչի համադրումով էր ներկայանում: Առիթ ունեցել եմ այդ ժամանակ ասելու, որ քաղտեխնոլոգների թիմի այդ որոշումը նպաստեց երկրորդ նախագահի էլեկտորալ արդյունքին ընդդիմության դաշտում առաջատար դառնալու առումով, բայց և արգելափակեց էլեկտորալ հաղթանակի բոլոր տեսական կամ գործնական հնարավորությունները: Հնարավոր է, քաղտեխնոլոգների թիմը սխալվեց այդ ժամանակ, բայց կասկածում եմ, որ Քոչարյանի նման քաղաքական փորձառություն ունեցող անձը կարող էր իր շտաբում ծառայության վերցնել այդպիսի մասնագետների: Չի կարելի բացառել, իհարկե, որ այդ մասնագետներին նրան նվիրել էին, և այդ նվերը հրաժարվելը խնդրահարույց է եղել կամ անհնար:
Տեր-Պետրոսյանի ու նրան շրջապատող ուժերի մոտ պահպանվել է Գիտնականի և Իմաստունի համադիր կերպարը, որ հիմա փորձում է համեմվել մասամբ Պայքարողի, մասամբ Անմեղի, մասամբ Հովանավորի և մի քանի արխետիպերին բնորոշող որոշակի գծերով: Կարծում եմ, առաջին նախագահին սպասարկող քաղտեխնոլոգների համար, հաշվի առնելով նրանց մասնագիտական որակները նաև, համարյա անհնարին է լինելու վերափոխել Տեր-Պետրոսյանի կերպարը և էլեկտորալ տեսանկյունից ավելի գրավիչ դարձնել: Ու սա, ի դեպ, ոչ թե կամ ոչ այնքան առաջին նախագահի անձի առանձնահատկություններով է պայմանավորված, որքան նրա նախընտրական թիմի աշխատանքի հնացած մեթոդներով:
Նմանատիպ սխալ տեսանելի է նաև երրորդ նախագահ Սերժ Սարգսյանի պարագայում, որին փորձում են ներկայացնել Հովանավորի և Իմաստունի արխետիպերի համադիր կերպարով՝ չնայած առնվազն 2021 թվականի ընտրական փորձից պետք է տեսանելի լիներ, որ ընտրազանգվածի բացարձակ մեծամասնության համար Սարգսյանի նման կերպարը ընկալելի և գրավիչ չէ: Այդուհանդերձ, թիմակից քաղտեխնոլոգները շարունակում են նույն քառոտանի կենդանիների կառքով երթևեկել և արդեն տևական ժամանակ է, որ երրորդ նախագհի կերպարը փորձում են որոշակիորեն թարմացնել կամ նորացնել Անմեղի արխետիպի հաշվին: Ակնհայտ է, որ այս քաղտեխնոլոգները երրորդ նախագահից պոկվողը չեն կամ էլ նրան դուր են գալիս իրեն կպած այդ մասնագետները:
Համարյա թե վստահ եմ, որ շուտով կստանանք Ծաղրածուների, Սպառողների, Հաճախորդների նոր խմբաքանակ, արդեն հայտնվել են Սիրահարի հավակնությամբ մի քանի՝ իրենց նոր հռչակած ուժեր, որոնց մասին կխոսեմ հաջորդ գրառման ժամանակ»։