12 սեպտեմբերի 2025 – 14:31 AMT
PanARMENIAN.Net – Պետական եկամուտների կոմիտեի նախագահ Էդուարդ Հակոբյանը հայտնել է, որ ներկայում վերահսկողական աշխատանքները կազմակերպվում են ռիսկերի վերլուծության հիման վրա, որի արդյունքում իրականացվում են թիրախային այցեր՝ ուղղված անկանխիկ գործարքների, ՀԴՄ-ների և այլ ֆինանսական խախտումների բացահայտմանը։
«Կիսում եմ այդ մտահոգությունը, և մեր ստուգումներն էլ են դա բացահայտում։ Եթե գիտեք, անցած տարի բարեփոխում տեղի ունեցավ՝ տարածքային տեսչությունները փակվեցին, և այժմ մեր տեսուչները Երևանում են աշխատում», – նշել է ՊԵԿ նախագահը։
Նրա խոսքով, գործելաոճի փոփոխության արդյունքում կոմիտեն անցել է կանխարգելիչ մոտեցման՝ նպատակ ունենալով հայտնաբերել և կանխել անկանխիկ գործարքների ոլորտում հնարավոր խախտումները։
«Եթե ինչ-որ մեկը չի գործարկում իր անկանխիկ վճարման համակարգերը, մենք վարչական միջոցներով կդիմակայենք դրան», – հավելել է Հակոբյանը:
Նա ընդգծել է, որ ՊԵԿ-ը պատրաստ է օրենքի սահմաններում գործադրել անհրաժեշտ բոլոր լծակները՝ խախտումներին հակազդելու համար։